विधान परिषदेचा निकाल जाहीर झाल्यापासून महाराष्ट्रातील राजकारणात अनेक राजकीय नाट्यमय घडोमोडी घडल्या आहेत. कालपासून राज्यात अनेक राजकीय भूकंप पहायला मिळाले आहेत. दरम्यान, काल रात्री एकनाथ शिंदे यांनी पहिल्यांदाचा समोर येऊन माध्यमांना प्रतिक्रिया दिली. परंतु बंड पुकारलेल्या कोणत्याही शिवसेना आमदारांची भूमिका काय हे समोर आले नव्हती. मात्र आता औरंगाबाद पश्चिमचे शिवसेना आमदार संजय शिरसाट यांनी प्रतिक्रिया दिली आहे.

आमची नेतृत्वावर नाराजी नसून आमची राष्ट्रवादी-काँग्रेसवर नाराजी असल्याच शिरसाट यांनी सांगितलं आहे. ते म्हणाले की, आम्ही सोबत असून, सर्वजण गुवाहाटीत आलो आहोत. आमची बैठक झाल्यावर एकनाथ शिंदे योग्य तो निर्णय घेतील. सद्या आम्ही शिवसनेचे 35 आणि अपक्ष 5 असे चाळीस आमदार सोबत आहोत. दुपारपर्यंत हा आकडा 46 च्या पुढे जाईल, असंही शिरसाट म्हणाले आहेत.

पुढे ते म्हणाले, आमची राष्ट्रवादी आणि काँग्रेसवर नाराजी असून नेतृत्वावर नारजी नाही. आता भाजपसोबत जायचं की आणखी काही याचा निर्णय एकनाथ शिंदे घेतील असेही शिरसाट म्हणाले. यावेळी आमदारांना मारहाण झाली का? या प्रश्वावर त्यांनी सांगितले की, आम्ही सर्व आमदार आहोत त्यांना कशी मारहाण केली जाऊ शकते. लोकप्रतिनिधी आहे त्यामुळे त्यांना कोण का मारहाण करेल. संजय राऊत काय बोलतात त्यांना माहित असून, त्यांना कुठून माहिती मिळते काय माहित असेही शिरसाट म्हणाले.