Nitin Deshmukh News : बंडखोरी करून सत्तेत आलेल्या शिंदे गटाने भाजपसोबत हातमिळवणी करून राज्यात सत्ता स्थापन केली. त्यानंतर विरोधकांनी 50 खोके एकदम ओके अशी जहरी टीका शिंदे गटावर करत आले आहे. मात्र, सुरुवातीला एकनाथ शिंदेंसोबत गेलेले आणि आत पुन्हा शिवसेनेत माघारी गेलेल्या नितीन देशमुखांनी काही गंभीर विधान केले आहेत. त्यामुळे अनेकांच्या भुवया उंचावल्या आहेत. शिंदे गटाचे सूरत ते गुवहाटीमधील अनेक व्हिडीओ आपल्याकडे आहेत, असा दावादेखील देशमुखांनी केला आहे. ते शिवसैनिकांच्या मेळाव्यामध्ये बोलत होते.

देशमुख म्हणाले की, 50 खोके एकदम ओकेचे षडयंत्र गेल्या दीड वर्षांपासून सुरू होते असेही ते म्हणाले. हे सत्तांतर पैशांच्या माध्यमातून झाले आहे. हे मी सिद्ध करेल आणि जर, ते मी सिद्ध करू शकलो नाही, तर मी महाराष्ट्राच्या विधानसभेत आत्महत्या करेल, असा इशारादेखील देशमुखांनी दिला आहे.

काही दिवसांपूर्वी माझी लाचलुचपत विभागाकडून चौकशी करण्यात आली आहे. मात्र, जर माझ्याविरोधात कारवाई केल्यास माझ्याकडे सुरत ते गुवाहाटी दरम्यानचे अनेक व्हिडिओ असून, ते मी सार्वजनिक करेल असा इशारा देशमुखांनी दिला आहे. लाचलुचपत विभागाकडून चौकशी करण्याऐवजी माझी ईडीकडून चौकशी करायला हवी होती, असे झाले असते तर, समाजात माझा मान वाढला असता, अशी खोचक टीकादेखील देशमुखांनी केली आहे.