सोलापूर : पतीच्या निधनानंतर कुटुंबाचा भार सांभाळणाऱ्या आईने मुलाला वाढविले, पण त्याच मुलाने शेतीच्या वादातून आई अक्काताई राजू चव्हाण (रा. हुन्नूर, ता. मंगळवेढा) यांच्या डोक्यात उखळ घातले. ८ जूनला झालेल्या भांडणात आई गंभीर जखमी झाली. मुलगा आपले काहीतरी बरेवाईट करेल, या भीतीने ती महिला मध्यरात्री एक वाजता ३५ किलोमीटर अंतरावरून पोलिस ठाण्यात आली. पोलिसांनी केवळ फिर्याद दाखल करून घेतली आणि जायला सांगितले. दुसऱ्या दिवशी सोमवारी (ता. ९) पोलिस त्या फिर्यादी महिलेला शोधण्यासाठी गावात पोचले.

पतीच्या निधनानंतर सासू- सासऱ्यांपासून बाजूला राहणाऱ्या अक्काताई यांनी शेतीत आपल्याला हक्क मिळावा म्हणून न्यायालयात धाव घेतली होती. शेतावर न्यायालयाकडून स्थगिती आणली होती. हा राग मनात धरून मुलगा बबलू याने आईच्या डोक्यात ॲल्युमिनियमचे उखळ घातले. रविवारी (ता. ८) मध्यरात्री एकच्या सुमारास मुलाने मद्यपान करून ही मारहाण केली. सासू- सासऱ्याने देखील, तुझा येथे राहण्याचा काही संबंध नाही, म्हणत शिवीगाळ करून दमदाटी केली होती. त्यांच्या भीतीने ५० वर्षीय अक्काताई यांनी मध्यरात्री एक वाजता मंगळवेढा पोलिसांत धाव घेतली.

मध्यरात्री एकच्या सुमारास पोलिस ठाण्यात फिर्याद द्यायला आलेल्या अक्काताईला पोलिसांनी तसेच का जाऊ दिले, असा प्रश्न उपस्थित होत आहे. विशेष बाब म्हणजे, दुसऱ्या दिवशी (सोमवारी) दुपारी फिर्यादीस शोधायला गेलेल्या पोलिसांना जखमी महिला खूप उशिरापर्यंत सापडलीच नाही.

जखमीला रात्री तसेच सोडले, दुसऱ्या दिवशी ती सापडलीच नाही

पतीच्या निधनानंतर एकट्याच राहणाऱ्या अक्काताई चव्हाण यांना त्यांच्याच पोटच्या मुलाने डोक्यात उखळ घालून मारण्याचा प्रयत्न केला. मध्यरात्री एक वाजता पोलिस ठाण्यात आलेल्या अक्काताईशी पोलिसांनी दुसऱ्या दिवशी फोनवरून संपर्क साधण्याचा प्रयत्न केला. फोन उचलत नसल्याने पोलिस गावात पोचले. त्यावेळी फिर्यादी फोन उचलत नव्हती, त्यांच्या घरी कोणी नव्हते. त्यावेळी पोलिसांनी पोलिस पाटलांना संपर्क साधला, पण ते सोलापुरात असल्याचे सांगण्यात आले. तपास अधिकारी म्हणाले, आम्ही फिर्यादीस शोधतोय, त्या शेतात असतील म्हणून फोन घेत नसतील. त्यांच्याशी संपर्क झाल्यावर अधिक माहिती आपल्याला दिली जाईल, असेही तपास अधिकाऱ्यांनी सांगितले.