खेड : शिवसेना पक्षनाव आणि धनुष्यबाण हे निवडणूक चिन्ह शिंदे गटाला दिल्यानंतर रत्नागिरीच्या खेड येथील गोळीबार मैदानात आज उद्धव ठाकरे यांची तोफ धडाडली. यावेळी उद्धव ठाकरे यांनी शिंदे फडणवीस सरकारवर कडाडून हल्लाबोल केला.

अडीच वर्ष घराबाहेर पडले नाहीत म्हणाणाऱ्या विरोधकांना धारेवर धरले. उद्धव ठाकरे म्हणाले की हे म्हणतात की अडीच वर्ष घराबाहेरच पडले नाहीत.. नाव्हतोच पडलो घराबाहेर, कारण कोरोना होता. पण मी घरामध्ये बसून जो महाराष्ट्र सांभाळला तो गरागरा गुवाहाटीला जावून देखल सांभाळू शकत नाहीयेत, असे ठाकरे म्हणाले.

पुढे बोलताना उद्धव ठाकरे म्हणाले की तुमचा अर्धावेळ फिरण्यामध्येच जातोय. एकतर दिल्लीला मुजरे मारायला जाणं यात अर्ध आयुष्य चाललंय आणि बाकीच्यां काही जणांना खोके अजून मिळले नाहीत, मंत्रिपद देता येत नाही. त्यांना सांभाळण्यात तुमचं उरलेलं आयुष्य जातंय. असा टोला शिंदे-फडणवीस यांच्यावर हल्ला केला.

पण मी जो महाराष्ट्र सांभाळला तसा कोणाच्याही हातून सावरला गेलाच नसता. देशाच्या पंतप्रधानांचे कोतूक झाले नाही ते महाराष्ट्राच्या मुख्यमंत्र्यांचं म्हणजेच महाराष्ट्राच्या जनतेचे झाले. आपल्या काळामध्ये कधीही मृतदेहांची विटंबना झाली नव्हती जी योगींच्या काळात झाली त्याबद्दल तुम्ही का बोलत नाहीत असा सवाल उद्धव ठाकरेंनी केला.