कोल्हापूर - देशपातळीवर इंडिया आघाडी स्थापन झाल्यापासून राज्यातही विरोधकांमध्ये उत्साह दिसून येत आहे. याच पार्श्वभूमीवर सर्वच राजकीय पक्षांनी तयारी सुरू केली आहे. त्यात आता लोकसभा मतदार संघांची चर्चा सुरू झाली असून कोल्हापूर लोकसभा मतदार संघाबाबतही चर्चा असून काँग्रेस नेते सतेज पाटील यांनी याबाबत विधान केलं आहे.

सतेज पाटील म्हणाले की, कोल्हापूर लोकसभा मतदार संघासाठी तिन्ही पक्ष चाचपणी करत आहेत. वरिष्ठ पातळीवर याचा निर्णय होईल. कोणत्याही परिस्थितीत महाविकास आघाडीचा खासदार करणं हेच आमचं ध्येय असणार आहे. राज्यातून ४० खासदार निवडून आले पाहिजे, ही आमची भूमिका असणार आहे. आमच्यात जागावाटपाबाबत कोणताही घोळ नाही, असंही ते म्हणाले. तसेच राज्यात आणि कोल्हापुरात वाद होणार नाही. आणखी निवडणुकीला ६ महिने बाकी असून काय-काय घडत ते बघत राहू.

कोल्हापुरात १० कोटी रुपयांचं पहिलं इंडोअर स्टेडियम होणार होतं. त्याला खासदार धनंजय महाडिकांनी स्थगिती आणण्याच काम केल्याची माहिती आहे. ही माहिती खरी-खोटी मला माहित नाही. त्यांनी खुलासा करणं आवश्यक आहे. मात्र इनडोअर स्टेडियम रद्द करणं हे पाप आहे. हा खेळाडूंवर अन्याय असल्याचं पाटील यांनी नमूद केलं.

लोकसभा निवडणुकीतील उमेदवारीबाबत सतेज पाटील म्हणाले की, श्रीमंत शाहु महाराजांविषयी आम्हाला आदरच आहे. परंतु, त्यांची स्वत:ची इच्छा काय, याबाबत त्यांच्याशी चर्चा झालेली नाही. मात्र कोल्हापूरमधून पुरागामी विचारांचा महाविकास आघाडीचा उमेदवार निवडून यावा हीच आमची इच्छा असल्याचं सतेज पाटील म्हणाले.