२५ जून १९८३ रोजी लंडनमधील लॉर्ड्सच्या मैदानावर भारतीय क्रिकेट संघाने विश्वचषकावर आपलं नाव कोरत इतिहास रचला. याच विजयगाथेवर आधारित '83' हा चित्रपट प्रेक्षकांच्या भेटीला येतोय. या बहुचर्चित आणि बहुप्रतिक्षित चित्रपटाचा ट्रेलर नुकताच प्रदर्शित झाला आहे. चित्रपटात अभिनेता रणवीर सिंग तत्कालीन भारतीय संघाचा कर्णधार कपिल देव यांच्या भूमिकेत आहे. ३ मिनिटं ४९ सेकंदांच्या या ट्रेलरमध्ये, दिग्दर्शक कबीर खान तुम्हाला 1983 मध्ये घेऊन जातो, जेव्हा भारताने ऐतिहासिक विजय मिळवला होता. ते क्षण पुन्हा एकदा या चित्रपटाच्या माध्यमातून प्रेक्षकांना जगता येणार आहेत. भारतीय संघाचा प्रवास, त्यांचा संघर्ष, त्यांचं यश-अपयश या सर्व गोष्टींची झलक यातून पहायला मिळते.

हा चित्रपट हिंदी, तमिळ, तेलुगू, कन्नड आणि मल्याळम या भाषांमध्ये प्रदर्शित होणार आहे. येत्या २४ डिसेंबर रोजी हा बहुप्रतिक्षित चित्रपट प्रेक्षकांच्या भेटीला येणार आहे. यामध्ये अभिनेत्री दीपिका पदुकोण ही कपिल देव यांची पत्नी रुमी देवची भूमिका साकारणार आहे. २०१९ मध्ये या चित्रपटाच्या शूटिंगला सुरुवात झाली. सुरुवातीला हा चित्रपट १० एप्रिल २०२० रोजी प्रदर्शित होणार होता. मात्र कोरोना महामारी आणि लॉकडाउनमुळे प्रदर्शनाची तारीख पुढे ढकलण्यात आली.

चित्रपटात ताहिर राज भसिन, जीवा, साकिब सलीम, जतिन सारना, चिराग पाटील, दिनकर शर्मा, निशांत दहिया, हार्डी संधू, साहिल खट्टर, अॅमी वर्क, आदिनाथ कोठारे, धैर्य कारवा, आर. बद्री, पंकज त्रिपाठी यांच्या महत्त्वपूर्ण भूमिका आहेत. तर रणवीर सिंगची पत्नी दीपिका पदुकोण चित्रपटात कपिल देव यांची पत्नी रुमी यांच्या भूमिकेत आहे.