आगामी मराठी 'बांबू' सिनेमाचा ट्रेलर नुकताच प्रेक्षकांच्या भेटीला आलाय. बॉईज फेम दिग्दर्शक विशाल देवरुखकर यांनी बांबू सिनेमाचं दिग्दर्शन केलंय. सिनेमात अभिनय बेर्डे प्रमुख भूमिकेत आहे. अभिनेत्री तेजस्विनी पंडितने बांबू सिनेमाची निर्मिती केली आहे. ट्रेलर धम्माल आणि भन्नाट आहे.

ट्रेलरमध्ये अभिनय बेर्डे ब्रेकअप झालेल्या प्रत्येक मुलीला रडायला खांदा देतोय. प्रत्येक मुलगी अभिनयला ‘त्या’ नजरेनं कधी बघतंच नाहीए. पुढे त्याच्या आयुष्यात ‘त्या’ नजरेनं बघणारी मुलगी येते. मात्र या प्रेमात त्याचा मित्र पार्थ भालेराव आड येतो. आता अभिनयला त्याचं खरं प्रेम मिळणार की प्रेमात बांबू लागणार? याचे उत्तर सिनेमा पाहिल्यावरच मिळेल.

विशेष गोष्ट म्हणजे ट्रेलरमध्ये तेजस्विनी पंडितचीही खास झलक दिसत आहे. तेजस्विनीची भूमिका अद्याप गुलदस्त्यात आहे. बांबू २६ जानेवारीला रिलीज होतोय. सिनेमात अभिनय बेर्डे, पार्थ भालेराव, वैष्णवी कल्याणकर यांच्यासोबतच शिवाजी साटम, समीर चौघुले, अतुल काळे आणि स्नेहल शिदम असे लोकप्रिय कलाकार आहेत.

सिनेमाचा ट्रेलर लाँच सोहळा नुकताच पार पडला असून सिनेमातील कलाकार आणि संपूर्ण टीम यावेळी उपस्थित होती. क्रिएटिव्ह वाईब प्रॅाडक्शन निर्मित या सिनेमाचे निर्माते तेजस्विनी पंडित, संतोष खेर आहेत. 'बांबू' चे दिग्दर्शन विशाल देवरुखकर यांनी केले असून लेखन अंबर हडप यांनी केले आहे.