Panchak Trailer News: गेल्या अनेक दिवसांपासून मराठी मनोरंजन विश्वात विविध चित्रपट रिलीज होत आहेत. झिम्मा 2 सिनेमा सध्या चांगलाच गाजतोय.

अशातच आगामी पंचक सिनेमाची सर्वांना उत्सुकता आहे. विशेष गोष्ट म्हणजे... या सिनेमाची निर्मिती केलीय अभिनेत्री माधुरी दीक्षित आणि डॉ. श्रीराम नेने या दोघांनी. नुकतंच पंचक सिनेमाचा ट्रेलर भेटीला आलाय.

पंचक सिनेमाचा ट्रेलर भेटीला

'पंचक' सिनेमाचा धमाकेदार ट्रेलर भेटीला आलाय. या ट्रेलरमध्ये सुरुवातीला दिसतं एका कुटुंबात एका व्यक्तीचा मृत्यू झालाय. पुढे त्याच कुटुंबात सर्वांच्या चेहऱ्यावर घबराट दिसते. कुटुंबातील एक व्यक्ती अंधश्रद्धेविरोधात आवाज उठवताना दिसतो. तर घरात पंचक लागल्याने 'आता कोणाचा नंबर' या भीतीने सगळ्यांची तारांबळ उडालेली दिसत होती.

पंचक सिनेमात दिग्गज कलाकारांची फौज

जयंत जठार, राहुल आवटे दिग्दर्शित या चित्रपटाचे डॉ. श्रीराम नेने आणि माधुरी दीक्षित नेने निर्माते आहेत तर नितीन प्रकाश वैद्य कार्यकारी निर्माते आहेत. आदिनाथ कोठारे, दिलीप प्रभावळकर, भारती आचरेकर, आनंद इंगळे, तेजश्री प्रधान, सतीश आळेकर, नंदिता पाटकर, सागर तळाशीकर, संपदा कुलकर्णी, आशिष कुलकर्णी, दीप्ती देवी, विद्याधर जोशी, आरती वडगबाळकर, गणेश मयेकर अशी मराठी सिनेसृष्टीतील मातब्बर मंडळी एकाच पडद्यावर पाहाण्याची संधी 'पंचक'च्या निमित्ताने मिळणार आहे. या चित्रपटाचे लेखन राहुल आवटे यांचे आहे.

या तारखेला पंचक होणार रिलीज

काही दिवसांपूर्वीच 'पंचक'चे उत्कंठा वाढवणारे टिझर सोशल मीडियावर झळकले होते. चित्रपटाबद्दलची उत्सुकता वाढलेली असतानाच आता या चित्रपटाचा ट्रेलर आज माधुरी दीक्षीतने शेअर केला. डॉक्टर श्रीराम नेने आणि माधुरी दीक्षित नेने प्रस्तुत 'पंचक' चित्रपटातील हे कोडे येत्या नवीन वर्षात म्हणजेच ५ जानेवारीला सुटणार आहे.