मुंबई - बॉ़लीवूडमध्ये ज्या कुणी प्रसिध्द अभिनेत्री आहेत त्यात विद्या बालनचा चाहतावर्ग मोठा आहे. वर्षभरात एखादाच चित्रपट करुन पुढची अनेक वर्षे लोकप्रिय होणा-या विद्याच्या अभिनयाची गोष्टच वेगळी आहे. तिचा अभिनय पाहणे हा एक वेगळा आनंद असल्याची भावना तिच्या चाहत्यांची आहे. मागील वर्षी तिचा शकुंतला देवी चित्रपट प्रसिध्द झाला होता. त्यालाही मोठ्या प्रमाणात प्रेक्षकांकडून प्रतिसाद मिळाला होता. त्यात विद्यानं एका गणिततज्ञ महिलेची भूमिका केली होती. सहज अभिनय करुन प्रेक्षकांच्या मनावर अधिराज्य करणा-या विद्यानं वेगळं स्थान बॉलीवूडमध्ये निर्माण केलं आहे.

द डर्टी पिक्चर मधून विद्याला घवघवीत यश मिळालं होतं. त्या चित्रपटानं तिला ग्लॅमर दिलं. मोठी प्रसिध्दीही मिळवून दिली. दाक्षिणात्य सिनेमातील सिल्क स्मिताच्या आयुष्यावर आधारित या चित्रपटाची निर्मिती करण्यात आली होती. सिल्क स्मिता ही दक्षिणेतील प्रसिध्द अभिनेत्री होती. जेव्हा विद्यानं हा सिनेमा केला. आणि तो सिनेमा पाहण्यासाठी ती तिच्या आईला घेऊन थिएटरमध्ये गेली होती तेव्हा जे काय झाले ते तिनं एका मुलाखतीत सांगितले. विद्यानं त्या चित्रपटामध्ये एक बोल्ड भूमिका केली होती. मात्र ती प्रेक्षकांच्या पसंतीस पडली होती.

सिल्क स्मिताची भूमिका साकारणा-या विद्याला या चित्रपटानं अनेक पुरस्कार मिळवून दिले होते. त्यासाठी तिला राष्ट्रीय पुरस्कारही मिळाला होता. आता हा सिनेमा प्रदर्शित होऊन नऊ वर्ष झाली आहेत. विद्यानं जेव्हा आपल्या परिवारानं हा चित्रपट पाहिला होता तेव्हा त्यांची नेमकी भावना काय होती हे यावेळी सांगितले. टाईम्स ऑफ इंडियाला दिलेल्या एका मुलाखतीत तिनं खुलासा केला आहे. ती म्हणाली, मी जेव्हा ही भूमिका करण्याचा निर्णय घेतला होता तेव्हा माझ्यावर फार दबाव होता. मानसिक ताणही होता तो म्हणजे आपण ही भूमिका योग्य प्रकारे करु की नाही याचा.

माझ्या घरच्यांचे मला नेहमीच समर्थन मिळाले आहे. त्यांनी सपोर्टही केला आहे. ही अभिमानाची गोष्ट म्हणावी लागेल. आई आणि वडिल दोघांनीही हा चित्रपट पाहिला होता. इंटरवल नंतर ते जेव्हा बाहेर आले तेव्हा वडिलांनी जोरात टाळी वाजवली. तर आई रडायला लागली होती.