Amruta khanvilkar : बहुचर्चित चंद्रमुखी सिनेमाने प्रेक्षकांना वेड लावलं. या चित्रपटातील गाणीही विशेष गाजली. पहिल्याच दिवशी या चित्रपटाने बॉक्स ऑफिसवर १ कोटींहून अधिकची कमाई केली. मराठी चित्रपट सृष्टीतील भव्य दिव्य प्रमोशन झालेला सिनेमा अशी याची ओळख बनली. चित्रपट प्रदर्शित होऊन चार आठवडे होऊनही चित्रपटाची किमया कमी झालेली नाही. दिवसेंदिवस हा चित्रपट अधिकच गाजतो आहे. या चित्रपटात अभिनेत्री अमृता खानविलकर चंद्राच्या म्हणजे प्रमुख भूमिकेत होती. टायटल रोल मिळालेला हा अमृताचा (amruta khanvilkar) पहिला सिनेमा होता. त्यामुळे सुरुवातीपासूनच तिने या चित्रपटासाठी बरीच मेहनत घेतली. या यशाचे सार्थक झाल्यांनतर अमृता नुकतेच तुळजाभवानीचे दर्शन घेतले. पण ज्या कलावंतीणीची भूमिका तिनं साकारली त्या लोककलावंतांसाठी आज तिने जनतेच्या दरबारात साकडं घातलं आहे.

लेखक विश्वास पाटील यांच्या कादंबरीवर बेतलेला ‘चंद्रमुखी’ हा चित्रपट प्रसाद ओक (prasad oak) याने दिग्दर्शित केला आहे. तर पटकथा-संवाद चिन्मय मांडलेकर याचे आहेत. या चित्रपटात दौलत या मुख्य पात्राची भूमिका आदिनाथ कोठारे यांनी साकारली आहे. तर चंद्राच्या भूमिकेत अमृता खानविलकर आहे. या चित्रपटाची कथा काल्पनिक असली तरी एका तमाशा कलावंतीण असणाऱ्या चंद्राच्या जीवनावर तो आधारित आहे, त्याला सत्याची किनार आहे. या चित्रपटाच्या दरम्यान अमृताने स्वतः लोककलावंतांच्या जीवनाचा अभ्यास केला, त्यावेळी तिला या कलाकारांच्या जगण्यातला संघर्ष दिसला. म्हणून आज तिने या लोककलावंतासाठी लोकांपुढे हात जोडले आहे. (amruta khanvilkar stands for folk artist patthe bapurav vithabai narayangaonkar and tamasha artist)

अमृताने एक इन्स्टा पोस्ट शेअर केली आहे, त्यात ती म्हणते, 'कदीतरी आमच्या औक्षात पन डोकवा जमलं तर.. दोन लाख लावण्य गीतं लिहिणारा आमचा कुबेर पट्ठे बापूराव म्हातारपणी गरिबीत मेला.. ९ महिन्याचं पोट घेऊन नाचणारी, मधीच पडद्या मागं जाऊन बाळाला जन्म देणारी आणि अडकित्यानं नाळ कापून पुन्हा मंचावर येऊन थाळी नाच करणारी आमची विठा बाई नारायणगावकर ह्यांच्या बद्दल लिहा की ओ कदीतरी.. येक कलावंतीण' अशी व्यथा तिनं मांडली आहे. (amruta khanvilkar instagram post)