मुंबई : 'बाहुबली'च्या यशानंतर प्रभासच्या चित्रपटाची प्रतिक्षा होती ती 'साहो' या चित्रपटाची. सध्या बॉक्स ऑफिसवर साहो चांगलाच धुमाकूळ घालतोय. नुकत्याच प्रदर्शित झालेल्या 'साहो'चे रिव्ह्यू समोर आले आहेत आणि त्याविषयी संमिश्र प्रतिक्रिया पाहायला मिळाल्या.

बॉलिवूड अभिनेत्री लिसा रे ने या सिनेमावर चोरीचे गंभीर आरोप केले आहेत. 'साहो' सिनेमात शिलो शिव सुलेमान (Shilo Shiv Suleman) या कलाकाराचं चित्र कॉपी करून सिनेमाच्या एका पोस्टरमध्ये वापरण्यात आल्याचं लिसाचं म्हणणं आहे.

इंस्टाग्राम अंकाउंटवर तिने दोन फोटो शेअर करत एक भली मोठी पोस्टही टाकली आहे. त्यातील एक फोटो हे शिलो यांचं चित्र आहे, तर दुसऱ्या फोटोमध्ये चित्रपटामधील एक सिन आहे. ही पोस्ट शेअर करताना कॅप्शनमध्ये लिहिलं आहे, ''आपल्याला पुढे येऊन बोलायला हवं. मोठ्या बजेटच्या निर्मितीमध्ये शिलो यांचं चित्र फेरफार करुन वापरण्यात आलं. ही प्रेरणा नाही, तर खुलेआम चोरी आहे. हे जगात कुठेच मान्य केलं जाणार नाही. या प्रॉडक्शननं मूळ चित्रकाराची परवानगी घेणे किंवा त्याला क्रेडिट देण्याची दखल घेतलेली नाही. हे खूप चुकीचं आहे."

साहो सिनेमातील हे चित्र 'बेबी वॉन्ट यू टेल मी' गाण्यात वापरण्यात आलं आहे. प्रभास आणि श्रद्धा या दोघांवर चित्रित करण्यात आलेला सीन हा मूळ चित्राशी काहीसा मिळता जुळता आहे. या सर्व प्रकरणानंतरही लिसाच्या आरोपांवर साहोच्या निर्मात्यांकडून अद्याप कोणतीही प्रतिक्रिया आलेली नाही.