अभिनेता अंशुमन विचारे सोशल मीडियावर त्याची मुलगी अन्वीचे विविध फोटो आणि व्हिडीओ पोस्ट करत असतो. चिमुरड्या अन्वीचा एक व्हिडीओ सध्या सोशल मीडियावर व्हायरल होत आहे. या व्हिडीओत ती तिच्या आईसोबत गप्पा मारत असून तिचा निरागसपणा नेटकऱ्यांना खूपच आवडला आहे. या व्हिडीओच्या शेवटी ती तिच्या आईला म्हणते, मी तुला म्हातारी होऊच देणार नाही. तिचं हेच वाक्य नेटकऱ्यांच्या मनाला भावलं असून त्यावर कमेंट्सचा वर्षाव होत आहे. आईला कामात मदत करण्यासाठी ती जेवण बनवायला सुरुवात करते आणि त्यासोबतच ती गप्पा मारत असते. अन्वीची आई तिला विचारते, मी म्हातारी झाल्यावर तू मला सांभाळशील ना? त्यावर अन्वी तिला म्हणते, "तू म्हातारी होणार मग मी तुला घाबरणार. पण मी तुला म्हातारी होऊच देणार नाही. कारण तू माझी मम्मी आहेस." अन्वीचा हाच निरागस संवाद नेटकऱ्यांना आवडला आहे. 

शूटिंगच्या व्यग्र वेळापत्रकातूनही अंशुमन त्याच्या कुटुंबीयांसाठी वेळ काढतो. शूटिंगमधून लवकर किंवा रात्री घरी परतला की तो मुलीला आणि पत्नीला गाडीतून फिरवून आणतो. शनिवारी कधी वेळ मिळाला, की तो कुटुंबीयांसोबत बाहेर जेवायला जातो. तर रविवारी सकाळचा चहा आणि नाश्ता बनवण्याची जबाबदारी अंशुमनचीच असते. 

अंशुमनच्या चिमुकल्या अन्वीचे सोशल मीडियावर खूप चाहते आहेत. तिच्या व्हिडीओला सोशल मीडियावर असंख्य लाइक्स व कमेंट्स मिळतात. आपल्या विनोदबुद्धीने प्रेक्षकांना खळखळून हसवणारा अंशुमन जेवढा लोकप्रिय आहे, तेवढीच त्याच्या मुलीची लोकप्रियता आहे. एकांकिकांमधून घडलेल्या अंशुमनने अनेक नाटक आणि मालिकांमध्ये काम केलंय. 'श्वास', 'पोश्टर बॉईज', 'विठ्ठला शपथ' यांसारख्या अनेक मराठी चित्रपटांमध्ये त्याने काम केलंय.