कमी कालावधीत तुफान लोकप्रिय झालेली मालिका म्हणजे राजा रानीची गं जोडी. या मालिकेने पहिल्या भागापासून लोकप्रियता मिळवण्यास सुरुवात केली आहे. त्यामुळे सध्याच्या घडीला ही मालिका लोकप्रिय कार्यक्रमांपैकी एक झाली आहे. विशेष म्हणजे गेल्या काही काळापासून या मालिकेत अनेक रंजक वळणं आली. त्यानंतर आता पुन्हा एक नवा ट्विस्ट या मालिकेत पाहायला मिळणार आहे. ढालेपाटल्यांच्या संपत्तीसाठी सुजितसोबत लग्न करणाऱ्या अपर्णाचा खरा चेहरा ढालेपाटील कुटुंबासमोर येणार आहे. (marathi serial raja rani chi g jodi-latest-update)

श्रावणमास सुरु झाल्यामुळे या दिवसांमध्ये घरात सत्यनारायणाची पूजा करावी अशी बेबी मावशीची इच्छा होती. तसंच या पुजेला संजू आणि रणजीतने बसावं असा आग्रहदेखील तिने धरला होता. परंतु, या पुजेला अपर्णा आणि सुजितने बसावं असं आईसाहेबांची म्हणजेच कुसुमावतीची इच्छा होती. त्यामुळे या पुजेला अपर्णा-सुजित तयार होतात. मात्र, याच दिवशी संजू अपर्णाचं खरं रूप साऱ्यांसमोर आणणार आहे. इतकंच नाही तर अपर्णाने गरोदरपणाचं व बाळ गेल्याचं खोट नाटक केलं हेदेखील ती उघड करणार आहे.

अपर्णाने केवळ ढालेपाटल्यांच्या संपत्तीसाठी आणि प्रतिष्ठेसाठी सुजितसोबत लग्न केलं होतं. हे सुजितला फार पूर्वीच कळून चुकलं होतं. मात्र,तरीदेखील तो संयमाने वागत होता. त्यातच अपर्णाने गरोदर असल्याचं व संजूमुळेच आपलं बाळ गेल्याचं खोटं नाटक केलं. मात्र, अर्पणाचं हे सत्य आता संजू सगळ्यांसमोर आणणार आहे. इतकंच नाही तर कुसुमावती स्वत: अपर्णाची घरातून हकालपट्टी करणार आहेत. त्यामुळे कुसुमावती व संजूमधील दुरावा आता तरी दूर होणार का? असा प्रश्न चाहत्यांच्या मनात नक्कीच निर्माण होणार आहे.