मी मंगळवार पेठेतला. पेठेतच सारी जडणघडण झाली. करिअर म्हणून संगीत क्षेत्राची निवड केल्यानंतर मुंबई गाठण्यापेक्षा कोल्हापुरात राहूनच काम करायचे आणि वेगळे काही तरी करण्याचा निर्णय घेतला. केवळ कोल्हापुरातीलच नव्हे तर मुंबई आणि एकूणच महाराष्ट्रभरातून कामे येतात आणि ती सर्वोत्कृष्ट करण्यावरच आजवर भर राहिला. सध्या ‘यूट्युब’वर अभिनेता नितीश चव्हाण आणि शिवानी बावकर प्रसिद्ध जोडीवर चित्रित केलेले ‘खुळाच झालो गं’ हे गाणं तमाम मराठी मनांना भुरळ घालत आहे. केवळ दोन दिवसात हे गाणं तब्बल दहा लाखाहून अधिक लोकांनी पाहिले आहे. गाण्याला संगीताबरोबच पार्श्‍वगायनही माझचं आहे. युवा संगीतकार ऐश्वर्य मालगावे संवाद साधत असतो आणि कलापूरची जिगर काय असते, याची प्रचितीही मिळत असते. 

एकूणच फिल्म इंडस्ट्रीत करिअरसाठी अनेकांनी मुंबई गाठली असली तरी ऐश्‍वर्य मात्र कोल्हापुरात राहूनच यशाला गवसणी घालतो आहे. ऐश्‍वर्यच्या घरी चार पिढ्यांपासून किराणा मालाचा व्यवसाय. माईसाहेब बावडेकर शाळेतून माध्यमिक शिक्षण झाल्यानंतर कलानिकेतन महाविद्यालयातून त्यांने ‘जी. डी. आर्ट कमर्शिअल’ केले.

मुळात त्याला संगीताची आवड इतकी की शिक्षण घेत असल्यापासूनच जाहिरातींसाठी जिंगल्स, माहितीपट, लघुपटांसाठी तो संगीत देवू लागला. एक वर्ष पुण्यात ग्राफिक डिझायनर म्हणूनही एका जाहिरात एजन्सीत काम केले. पण, संगीत काही सोडवत नव्हते. पुन्हा कोल्हापुरात तो आला. संगीत शिक्षक श्री. साकव यांचं मार्गदर्शन तो घेवू लागला.

पुढे लंडनमधील ट्रिनिटी कॉलेज ऑफ म्युझिक या कॉलेजमधून वेस्टर्न क्‍लासिकल संगीताचे धडेही त्याने घेतले आणि सात वर्षापूर्वी राजारामपुरीत स्वतःचा ‘कॉर्डस दि म्युझिक स्टुडिओ’ या नावाने स्टुडिओ सुरू केला. आजवर अनेक हिंदी, मराठी, कन्नड आणि मल्याळम्‌ चित्रपटांना त्यानं संगीत दिलं आणि कैक लघुपटांसाठी पार्श्‍वसंगीतही दिले. ‘हॅप्पीमॅन’, ‘चौकट’, ‘जेंटलमन’ या लघुपटांसाठी अनेक पुरस्कारही मिळाले.

कारगिल युद्धात शहिद झालेल्या जवानांना अभिवादन करण्यासाठी गेल्याच वर्षी  ‘सलाम कारगिल’ हे गाणे त्याने तयार केले. त्याची दखल घेऊन भारतीय नौदल सेनेवर तयार केलेल्या माहितीपटासाठी संगीत संयोजनाची संधी त्याला मिळाली. एका हिंदी चित्रपटासाठी सध्या तो पार्श्वसंगीत देत असून ‘खुलाच झालो गं’ गाण्याचं यश त्याला पुन्हा नव्या जोमानं काम करण्याची प्रेरणा देणार आहे. 

कलापूर कोल्हापुरात राहूनच यशस्वी संगीतकार होण्याचे स्वप्न बाळगले. यशाचा एकेक टप्पा पार करत पुढे चाललो आहे. पुढचा प्रवास नक्कीच यशोलौकिकाच्या शिखरावर पोचवेल, हा आत्मविश्‍वास नक्कीच आहे.
- ऐश्‍वर्य मालगावे