अभिनेत्री निशा रावलने Nisha Rawal पती करण मेहरावर Karan Mehra कौटुंबिक हिंसाचाराची तक्रार दाखल केल्यानंतर ३१ मे रोजी त्याला अटक करण्यात आली. 'करणने माझा गळा आवळून डोकं भिंतीला आपटलं,' असा आरोप निशाने केला होता. दुखापतीचे फोटोसुद्धा तिने माध्यमांसमोर दाखवले होते. जामिनावर सुटल्यानंतर करणने निशावर काही प्रत्यारोप केले. निशाने घटनेच्या आधीच घरातील कॅमेरे बंद करून ठेवल्याचा आरोप त्याने केला. त्यामुळे सत्य काय आहे हे कोणाला कळूच शकलं नाही, असं तो म्हणाला. याप्रकरणी आता निशाने घरातील कॅमेरे बंद केल्याचं कबूल केलं आहे. निशा-करणच्या 4BHK घरात सात कॅमेरे आहेत. बेडरुम वगळता सर्व ठिकाणी कॅमेरे असल्याचं तिने स्पष्ट केलं. (Nisha Rawal reveals why she switched off cameras inside her house with Karan Mehra)

याबद्दल एका वेबसाइटला दिलेल्या मुलाखतीत करण म्हणाला होता, 'हॉलमधील कॅमेरामध्ये घडलेली घटना कैद झाली असती. मात्र निशाने ऐनवेळी तो कॅमेरा बंद केला होता. जर घटनेचं फुटेज असतं, तर सत्य सर्वांसमोर आलं असतं. मात्र सर्व कॅमेऱ्यांचं मुख्य स्विच निशाने बंद करून ठेवलं होतं. हा सर्व कट आधीच रचलेला आहे, असं मला वाटतंय.'

करणच्या आरोपांवर काय म्हणाली निशा?

'होय, घरातील कॅमेरे बंद होते आणि त्यांना काही दिवसांपूर्वीच मी बंद केलं होतं. कॅमेरा चालू असता करण माझ्यासोबत आणि मुलासोबत खूप चांगला वागत होता आणि जिथे कॅमेरा नाही, तिथे बेडरुममध्ये तो मला मारत असे. त्यामुळे मी सर्व कॅमेरे काही दिवसांपूर्वीच बंद केले. आता पोलिसांनी डिजिटल व्हिडीओ रेकॉर्डर जप्त केला आहे, त्यामुळे त्यात सर्वकाही रेकॉर्ड झालं असेल.'

२०१२ मध्ये करण आणि निशाने लग्न केलं. गेल्या चौदा वर्षांपासून हे दोघं एकमेकांना ओळखतात आणि त्यांना चार वर्षांचा कविश हा मुलगा आहे. ३१ मे रोजी करणला अटक झाल्यानंतर या दोघांमधील वाद माध्यमांसमोर आले. करण-निशाने घटस्फोटासाठी अर्ज केल्याचंही समजतंय.