सिनेसृष्टीतील सर्वोच्च पुरस्कार म्हणून गौरवला जाणाऱ्या यंदाच्या ९४ व्या ऑस्कर पुरस्कार सोहळ्याला सुरुवात झाली आहे. दरवर्षीप्रमाणे यंदाही लॉस एंजेलिस येथील डॉल्बी थिएटरमध्ये या कार्यक्रमाचे आयोजन करण्यात आले आहे. या पुरस्कार सोहळ्यात पारितोषिकांचे वितरण सुरु असतानाच मोठा राडा झाला आहे. हॉलीवूडचे प्रसिद्ध अभिनेते विल स्मिथ (will smith) याने कार्यक्रमाचे होस्ट क्रिस रॉक (chris rock) यांच्या कानाखाली मारली आहे. रॉक याने विल स्मित यांच्या पत्नीवर विनोद केल्याने विल स्मिथ यांचा संताप अनावर झाला. स्मित यांनी मंचावर येऊन रॉक यांना मारले. त्यांनतर ही बाब अत्यंत निंदनीय असल्याचे सर्व स्तरातून बोलले जात आहे. (Oscars 2022: will smith slapped chris rock)

क्रिस रॉक याने G. I. JANE या चित्रपटावरून विल स्मिथ यांची पत्नी जेडा पिंकेट स्मिथ यांची थट्टा केली. जेडाच्या 'टक्कल' असण्यावरून त्याने भाष्य केले. परंतु जेडा यांनी अलोपेसिया या गंभीर आजारामुळे केस काढले आहेत. पत्नीची चुकीच्या पद्धतीने झालेली ही थट्टा सहन न झाल्याने स्मिथ यांचा पारा भडकला आणि त्यांनी रॉक यांच्या कानाखाली मारली.

विल स्मिथ यांना 'किंग रिचर्ड' या चित्रपटासाठी नामांकन होते. किंबहुना त्यांना सर्वोत्कृष्ट अभिनेत्याचा पुरस्कारही प्राप्त झाला. परंतु रॉक यांच्या विनोदामुळे संपूर्ण पुरस्कार सोहळ्याला गालबोट लागले आहे. काही माध्यमांनी दिलेल्या माहितीनुसार घडलेल्या प्रकाराबद्दल स्मिथ आणि 'द अकादमी'ची माफी देखील मागितली आहे.