Prashant damle wins Natya Parishad Election: एखाद्या राजकीय निवडणुकी इतकं महत्व प्राप्त झालेली अखिल भारतीय मराठी नाट्य परिषदेची पंचवार्षिक निवडणूक अखेर काल रविवार १६ एप्रिल रोजी पार पडली. संध्याकाळी ५.३० पर्यंत मतदान सुरू होते. या निवडणुकी नंतर तातडीने मत मोजणीला सुरुवात झाली.

रात्री उशिरा पर्यंत मतमोजणी आणि फेरमोजणी झाल्यानंतर पहाटे अखिल भारतीय मराठी नाट्य परिषदेचा निकाल लागला. या पंचवार्षिक निवडणुकीत प्रशांत दामले यांच्या रंगकर्मी नाटक समूहाचे पारडे जड होत त्यांचा दणदणीत विजय झाला.

मुंबई मध्यवर्ती शाखेतील दहा जागांपैकी ८ जागांवर दामले यांच्या रंगकर्मी नाटक समूहाचे उमेदवार निवडून आले तर उर्वरीत दिन जागांवर प्रसाद कांबळी यांच्या आपलं पॅनलचे दोन उमेदवार निवडून आले.

(prashant damle wins in Natya Parishad Election Result 2023 prasad kambli defeat)

यंदा दामले vs कांबळी अशी लढाई होती. त्यात यंदाच्या निवडणुकीत राजकीय हस्तक्षेप असल्याच्या जोरदार चर्चा झाल्या. आरोप प्रत्यारोप झाले. पण अखेर दामले यांनी बाजी मारत नाट्य परिषदेवर आपला झेंडा रोवला.

मुंबई मध्यवर्तीत शाखेत एकूण १३२८ इतके मतदान झाले. त्यापैकी माटुंगा यशवंत नाट्य मंदिर येथे १२४५ आणि गिरगांव येथे ८३ मतदान झाले. तर मुंबई उपनगर शाखा (मुलुंड - बोरिवली- वसई) यांचे एकूण ७३० मतदान झाले.

दामले यांच्या 'रंगकर्मी नाटक समूहा'चा ८/२ असा विजय झाला यामध्ये प्रशांत दामले, विजय केंकरे, विजय गोखले, सयाजी शिंदे, सुशांत शेलार, अजित भुरे, सविता मालपेकर, वैजयंती आपटे भरघोस मतांनी विजयी झाले. तर उर्वरित दोन उमेदवार हे आपलं पॅनल मधून विजयी झाले असूनह यामध्ये स्वतः प्रसाद कांबळी आणि अभिनेत्री सुकन्या मोने विजयी झाल्या.

अ. भा. मराठी नाट्य परिषद पंचवार्षिक निवडणूक २०२३-२८

मध्यवर्ती शाखा - विजयी उमेदवारांना मिळालेल्या मतांची आकडेवारी

१) प्रशांत दामले (७५९)

२) विजय केंकरे (७०५)

३) विजय गोखले (६६४)

४) सयाजी शिंदे (६३४)

५) सुशांत शेलार (६२३)

६) अजित भुरे (६२१)

७) सविता मालपेकर (५९१)

८) वैजयंती आपटे (५९०)

९) सुकन्या कुलकर्णी-मोने (५६७)

१०) प्रसाद कांबळी (५६५)