काही दिवसांपूर्वीच निलेश कृष्णाजी पालांडे ऊर्फ निलेश कृष्णा लिखित, दिग्दर्शित 'शिमगा' या चित्रपटाचा टिझर रिलीज झाला. ते पाहून या चित्रपटात काय पाहायला मिळणार याची उत्सुकता वाढली असतानाच, आता या चित्रपटाचा ट्रेलर सोशल मीडियावर लाँच करण्यात आला आहे.

कोकणची शान असलेला आणि ज्या सणाची कोकणासह महाराष्ट्रातील प्रत्येक चाकरमानी आवर्जून वाट पाहत असतो तो शिमगोत्सव या चित्रपटात अनुभवता येणार आहे. ट्रेलर बघितल्यावर तरी या चित्रपटात कोकणातील शिमगोत्सवादरम्यान असलेले जोशमय वातावरण, गावागावात मानपानावरून होणारे वाद, अंतर्गत राजकारण पाहायला मिळणार असे दिसत आहे. प्रेमकथाही प्रेक्षकांना या चित्रपटात पाहायला मिळेल.

'चॉकलेट बॉय'ची इमेज बाजूला ठेवून अभिनेता भूषण प्रधान याने या चित्रपटात रांगडी भूमिका साकारली आहे. तर मानसी पंड्याच्या निमित्ताने मराठी चित्रपटसृष्टीला एक नवीन चेहरा मिळाला आहे. याव्यतिरिक्त राजेश शृंगारपुरे, कमलेश सावंत, सुकन्या सुर्वे, विजय आंदळकर यांच्या या चित्रपटात प्रमुख भूमिका आहेत. श्री केळमाई भवानी प्रॉडक्शन निर्मित, प्रस्तुत 'शिमगा' हा चित्रपट 15 मार्च ला सर्वत्र प्रदर्शित होत आहे.

पंकज पडघण यांचे संगीत लाभलेल्या या सिनेमातील गाणी गुरु ठाकूर आणि वलय यांची आहेत तर नृत्यदिग्दर्शन दिपाली विचारे यांनी केले आहे. चित्रपटाच्या चित्रीकरणाची जबाबदारी अनिकेत खंडागळे यांनी सांभाळली आहे.