अनेकांच्या हुबेहूब नकला करून प्रेक्षकांना खळखळून हसवणारी श्रेया बुगडे महाराष्ट्राच्या घराघरात लोकप्रिय आहे. 'फू बाई फू' आणि 'चला हवा येऊ द्या' या कार्यक्रमांमुळे तिच्यातील अभिनयकौशल्याला वाव मिळाला. सोशल मीडियावर सक्रिय असणारी श्रेया चाहत्यांसोबत विविध फोटो आणि व्हिडीओ शेअर करत असते. इन्स्टाग्राम या फोटो शेअरिंग अॅपवर तिचा मोठा चाहतावर्ग आहे. इन्स्टाग्रामवर श्रेयाने पती निखिल शेठसाठी खास पोस्ट लिहिली आहे. १ एप्रिल रोजी पतीच्या वाढदिवसानिमित्त फोटो शेअर करत श्रेयाने ही पोस्ट लिहिली आहे. या पोस्टमध्येही श्रेयाची विनोदबुद्धी लपून राहिलेली नाही. 

'बालपणाची पहिली चाळीस वर्षे ही नेहमीच कठीण असतात याच्याशी तू सहमत असशील अशी मला खात्री आहे. त्यामुळे या चाळीस वर्षांसाठी चिअर्स. तुझ्याकडे मी आहे. त्यामुळे याव्यतिरिक्त तू आणखी काय मागू शकशील माहित नाही. पण नेहमी लक्षात ठेव, की आयुष्यात कितीही कठीण प्रसंग आले, समस्या आल्या तरी किमान तुझी बायको तरी कुरुप नाही. मला अभिमान आहे की मी एका अशा व्यक्तीशी लग्न केलंय, जो स्वप्न सत्यात उतरवण्यासाठी खूप मेहनत घेतो आणि वाढदिवसानिमित्त तुझी सर्व स्वप्न पूर्ण होवोत अशी मी प्रार्थना करते. आतापर्यंत मला सहन केलंस यासाठी तुला खूप प्रेम', अशा शब्दांत श्रेयाने तिच्या भावना व्यक्त केल्या. १ एपिल हा 'एप्रिल फूल' मानला जातो. त्यामुळे श्रेयाने पोस्टच्या अखेरीस हेसुद्धा स्पष्ट केलं की खरंच तिच्या पतीचा वाढदिवस आहे. 

हेही वाचा : 'घुंगरू' गाण्यावर रसिका सुनीलच्या बॉयफ्रेंडचा धमाकेदार डान्स

२०१५ मध्ये श्रेया आणि निखिलने प्रेमविवाह केला. एका मालिकेच्या शूटिंगदरम्यान या दोघांची पहिल्यांदा ओळख झाली. शूटिंगदरम्यान निखिलने अनेकदा श्रेयासोबत मैत्री करण्याचा प्रयत्न केला. मात्र तसं न होता अनेकदा त्यांच्यात वादच झाले. नंतर निखिल एका मालिकेची निर्मिती करत होता. त्यावेळी श्रेयाने त्याला अभिनंदन करण्यासाठी फोन केला आणि तिथूनच त्यांच्या नात्याला खऱ्या अर्थाने सुरुवात झाली.