Shreyas Talpade Health Update : प्रसिद्ध अभिनेता श्रेयस तळपडेला वेलकम टू द जंगल चित्रपटाच्या सेटवर हदयविकाराचा झटका आला अन् चाहत्यांना मोठा धक्का बसला. त्यानंतर त्याला तातडीनं मुंबईतील एका रुग्णालयात दाखल करण्यात आले. त्याच्यावर अँजिओप्लास्टी करण्यात आल्याचेही सांगण्यात आले आहे. यानंतर आता डॉक्टरांनी त्याच्या तब्यतेविषयी माहिती दिली आहे.

४७ वर्षीय श्रेयस हा गेल्या दोन दशकांहून अधिक काळ मनोरंजन विश्वात सक्रिय आहे. तो त्याच्या प्रभावी भूमिकांमुळे नेहमची चाहत्यांच्या कौतुकाचा विषय राहिला आहे. चित्रपट, मालिकांमधील त्याच्या भूमिकांना प्रेक्षकांचा मोठा प्रतिसाद मिळाला आहे. अशात श्रेयसला आलेल्या हदयविकाच्या झटक्याच्या बातमीनं चाहत्यांना मोठा धक्का बसला होता. तो बॉलीवूडचा खिलाडी अक्षय कुमारच्या वेलकम टू द जंगल नावाच्या चित्रपटाचे शुटींग करत होता. त्यावेळी ही घटना घडली.

डॉक्टरांनी दिलेल्या माहितीनुसार आता श्रेयसवर अँजिओप्लास्टी करण्यात आली असून त्याची प्रकृती स्थिर आहे. त्याच्या प्रकृतीत सुधारणा होत असल्याचे दिसून येत आहे. येत्या काही दिवसांत त्याला डिस्चार्जही देण्यात येईल असे सांगण्यात आले आहे. इंडिया टुडेनं याबाबत वृत्त दिले आहे. श्रेयसच्या प्रकृतीविषयी सोशल मीडियावर व्हायरल झालेल्या पोस्टनंतर चाहत्यांनी काळजी व्यक्त केली आहे. त्याला विश्रांती घेण्याचा सल्ला दिला आहे.

यंदाच्या वर्षी अशीच एक घटना प्रसिद्ध अभिनेत्री सुश्मिता सेनच्याबाबतही घडली होती. ४७ वर्षीय सुश्मिता ही राजस्थानमध्ये आर्या ३ च्या शुटींगमध्ये व्यस्त होती. त्याचवेळी तिला हदयविकाराचा झटका आला होता. याबाबत सुश्मितानं इंस्टावर सविस्तर पोस्ट लिहून चाहत्यांना त्याविषयी माहिती दिली होती. तिच्यावरही अँजिओप्लास्टीची शस्त्रक्रिया करण्यात आली होती. मला हदयविकाराचा मोठा झटका येऊन गेला हे माझ्या डॉक्टरांनी मला सांगितले. असे सुश्मितानं त्या पोस्टमध्ये म्हटले होते.

श्रेयस हा फिरोज नाडियावाला यांच्या वेलकम टू द जंगल नावाच्या चित्रपटाच्या शुटींगमध्ये व्यस्त असताना त्याला अचानक अस्वस्थ वाटू लागले. त्यानंतर त्याला तातडीनं रुग्णालयात दाखल करण्यात आले होते. चित्रपटाविषयी बोलायचे झाल्यास त्यात श्रेयस सोबत अक्षय कुमार, अर्शद वारसी, परेश रावल, तुषार कपूर, दिशा पटानी, जॅकलीन फर्नांडिझ, लारा दत्ता यांच्याही भूमिका आहेत.

काही दिवसांपूर्वी अक्षय कुमारनं त्याच्या या चित्रपटाचा एक बीटीएस व्हिडिओ शेयर केला होता. त्यामध्ये श्रेयसनं केलेल्या एका सीनचे चाहत्यांनी कौतुक केले होते. तो त्याच्या सहकारी कलाकारांसोबत मोठ्या गमतीनं तो सीन करत होता.