Squid Game Web Series: नेटफ्लिक्स या ओटीटी प्लॅटफॉर्मवर एकापेक्षा एक दमदार वेब सीरिज प्रेक्षकांच्या भेटीला येत आहेत. १७ सप्टेंबर रोजी नेटफ्लिक्सवर 'स्क्विड गेम' Squid Game ही वेब सीरिज प्रदर्शित झाली. या सीरिजने अवघ्या महिन्याभरात अनेक विक्रम मोडले आहेत. या कोरियन वेब सीरिजला जगभरात दमदार प्रतिसाद मिळतोय.

'स्क्विड गेम'चं कौतुक करत नेटफ्लिक्सने लिहिलं, 'दक्षिण कोरियाच्या स्क्विड गेम या सीरिजने आतापर्यंत अनेक लोकप्रिय वेब सीरिजना मागे टाकलं आहे. या सीरिजला प्रेक्षकांचा भरभरून प्रतिसाद मिळतोय.' काही दिवसांपूर्वीच मुंबई पोलिसांच्या अधिकृत ट्विटर अकाऊंटवर ट्रॅफिकच्या नियमांबाबत एक ट्विट करताना या सीरिजचा आधार घेतला गेला. स्क्विड गेमच्या एका छोट्या क्लिपच्या माध्यमातून त्यांनी नागरिकांना ट्रॅफिकचे नियम समजावून सांगण्याचा प्रयत्न केला.

या वेब सीरिजने अवघ्या महिन्याभरात १३ कोटींहून अधिक व्ह्यूज मिळवले आहेत. नेटफ्लिक्सवरील लोकप्रिय वेब सीरिज ब्रिजर्टनलाही स्क्विड गेमने मागे टाकलं आहे. 'बिजर्टन'ला एका महिन्यात ८ कोटी २० लाख इतके व्ह्यूज मिळाले होते. स्क्विड गेम या सीरिजला ३० हून अधिक भाषांमध्ये प्रदर्शित केलं गेलं आहे. सीरिजचे एकूण ९ एपिसोड्स असून ८ तास १२ मिनिटांचा पहिला सिझन आहे.