मुंबई - बॉलीवूडमध्ये(bollywood) चित्रपट समीक्षक (movie critics) म्हणून आदरानं घेतलं जाणारं नाव म्हणजे राशिद इराणी (rashid irani) यांचे निधन झाले आहे. ते 74 वर्षांचे होते. गेल्या काही दिवसांपासून ते आजारी होते. त्यांच्यावर एका रुग्णालयामध्ये उपचारही सुरु होते. मात्र त्या दरम्यान त्यांची प्राणज्योत मालवली. त्यांचे जवळचे मित्र रफीक इलियास यांनी याबाबत माहिती दिली. रफीक म्हणाले, त्यांचे जाणे हे अतिशय वेदनादायी आहे. एक अभ्यासू, जाणकार मित्र त्यांच्या निमित्तानं आम्ही गमावला आहे.

वास्तविक काही दिवसांपूर्वीच राशिद यांचा मृत्यु झाल्याची बातमी सुत्रांनी दिली होती. त्यानुसार ते अंघोळीला गेले असताना बाथरुममध्ये पाय घसरुन पडले होते. त्यातच त्यांचा मृत्यु झाल्याची धक्कादायक बातमी समोर आली आहे. रफीक यांनी सांगितले की, आम्हाला सुरुवातीला वाटले की, ते काही कामानिमित्तानं बाहेर गेले आहेत. त्यामुळे त्याकडे दुर्लक्ष केले. मात्र त्यांच्याशी काहीच संपर्क होत नसल्यानं चिंता वाटली. आम्ही पोलिसांना याबाबत माहिती दिली. पोलिसांनी घराचा दरवाजा तोडला. आणि त्यानंतर खरा प्रकार समोर आला. गेल्या वर्षी राशिद यांना कोरोना झाला होता. तेव्हापासून त्यांची तब्येत ठीक नव्हती.

मुंबई प्रेस क्लबनं देखील ट्विट् करुन राशिद इरानी यांच्या निधनाची बातमी दिली आहे. त्यात म्हटलं आहे की, देशातील आघाडीच्या समीक्षकांमध्ये राशिद यांचे नाव घ्यावे लागेल. 30 जुलैला त्यांचे निधन झाले. मात्र दोन ते तीन दिवस त्याविषयी कुणालाही माहिती नव्हती. ते मुंबई प्रेस क्लबचे एक प्रमुख सदस्यही होते. आपल्या समीक्षेनं त्यांनी जाणकार वाचकांची पसंती मिळवली होती. चित्रपट वर्तुळातही ते त्यांच्या लिखाणामुळे प्रसिद्ध होते.