फरहान अख्तर (Farhan Akhtar) आणि शिबानी दांडेकर(Shibani Dandekar) अखेर तीन वर्ष एकमेकांना डेट केल्यानंतर लग्नबंधनात अडकणार आहेत. २१ तारखेला बॉलवूडमधील काही निमंत्रित अनं जवळच्या मित्रपरिवाराच्या उपस्थितीत या दोघांचे रीसेप्शन पार पडणार आहे, तर त्याआधी १९ फेब्रुवारीला फरहानच्या खंडाळा येथील फार्महाऊसवर महाराष्ट्रीयन पद्धतीतं हे दोघे लग्नगाठ बांधणार असल्याचं बोललं जात आहे. पण लग्नाआधीच्या हळद आणि मेहेंदी सोहळ्याला मात्र सुरुवात झाली आहे. अनेक सेलिब्रिटींनी या सोहळ्याला उपस्थिती लावल्याचे काही फोटो-व्हिडीओ समोर आले आहेत.

यावेळी शिबानीची मोठी बहिण अनुष्का दांडेकर,रिया चक्रवर्ती,अमृता अरोरा यांनी हळदी समारंभाला उपस्थिती दर्शवली. या हळदी समारंभाचा एक व्हिडीओ सध्या सोशल मीडियावर व्हायरल होत आहे. सेलिब्रिटी फोटोग्राफर विरेंदर चावलानं त्याच्या अधिकृत इन्स्टाग्राम अकाऊंटवर तो शेअर केला आहे. या व्हिडीओत फरहानची उपस्थिती लक्षणीय होती,अर्थात नवरदेव जो ठरला तो. पॉप्युलर व्हि.जे आणि शिबानीची मोठी बहिण अनुष्का दांडेकर,अमृता अरोरा,रिया चक्रवर्ती यावेळी त्यांच्या गाडीतून उतरताना स्पॉट केले गेले.

कोरोनातून बऱ्या झाल्यानंतर शबाना आझमी ज्या फरहानच्या सावत्र आईदेखील आहेत त्यांनीही उपस्थिती दर्शवली होती.जावेद अख्तर यांनी काही दिवसांपूर्वीच फरहान-शिबानीच्या लग्नाची बातमी मीडियाला दिली होती. त्याचबरोबर हे लग्न त्यांच्या खंडाळा येथील फार्महाऊसवर खूप खाजगी आणि मोजक्या खास लोकांच्या उपस्थितीत होणार असल्याचंही त्यांनी सांगितलं होतं.

फरहानच्या कामाविषयी म्हणायचं झालं तर तो पुन्हा एकदा दिग्दर्शक म्हणून आपल्याला 'जी ले जरा' सिनेमाचं दिग्दर्शन करताना दिसणार आहे. त्यानं या सिनेमासाठी लेखकाची जबाबदारीही आपली बहिण झोया अख्तर आणि रीमा कागटीसोबत उचलली आहे. या सिनेमात प्रियंका चोप्रा,कतरिना कैफ,आणि आलिया भट मुख्य भुमिकेत दिसणार आहेत. या सिनेमाच्या चित्रिकरणाला या वर्षातच सुरुवात केली जाणार आहे.