Athang: 'अथांग' वेब सिरिजचा ट्रेलर रिलीज होण्यापुर्वी पासूनच या वेब सिरिजची प्रचंड चर्चा रंगली होती. त्यानंतर  ट्रेलर झळकल्यापासून प्रेक्षकांना अनेक प्रश्न पडले आहेत. या वाड्यात नक्की काय गूढ दडले आहे, ही अळवट कोण आहे आणि तिचा सरदेशमुखांच्या वाड्याशी काय संबंध? त्या कड्यामागील रहस्य ? असे अनेक अनुत्तरित प्रश्नाच्या उत्तरांची प्रेक्षकांना उत्सूकता लागलेली होती. त्यामूळे प्रेक्षक या वेब सिरिजची आतुरतेने वाट पाहत होते. 

‘अथांग’ ही सीरिज रिलीज होताच प्रेक्षकांची तिला पसंती मिळाली आहे. या सीरिजने प्रदर्शित झाल्यानंतर काही वेळातच या सिरिजने नवा रेकॉर्ड बनवला आहे. प्रदर्शनाच्या पहिल्याच दिवशी इतकं रेकॅार्ड ब्रेक करत यश मिळवणारी ही प्लॅनेट मराठी ओटीटीवरील पहिलीच वेबसीरिज ठरली आहे. पहिल्याच दिवशी मोठ्या संख्येने प्रेक्षकांनी ‘अथांग’ ही वेब सीरिज पाहिली आहे. या सीरिजचे पहिले दोन भाग प्रेक्षकांच्या भेटीला आले आहेत. ही वेब सिरिज प्रेक्षकांच्या पसंतीस पडत आहे.

अथांग'च्या निमित्ताने तेजस्विनी पंडित पहिल्यांदाच निर्मिती क्षेत्रात पदार्पण करत आहे. या सीरिजला मिळणारा प्रतिसाद पाहून तेजस्विनी पंडितने एक पोस्ट शेअर केली आहे. त्याबरोबरचं ती म्हणते की, ‘आज माझ्या मनात काय भावना आहेत, त्या मी शब्दांत व्यक्त करूच शकत नाही. निर्माती म्हणून हा माझा पहिलाच प्रोजेक्ट, त्यामुळे हा माझ्यासाठी सुखावणारा क्षण आहे. मात्र याचे सारे श्रेय ‘अथांग’च्या संपूर्ण टीमला जाते. यामागे सगळ्यांचीच मेहनत आहे. प्रेक्षकांच्या खूप सकारात्मक प्रतिक्रिया येत आहेत. प्रेक्षक आता पुढील भागांची आतुरतेने वाट पाहत आहेत.’

प्लॅनेट मराठी ओटीटीवर जयंत पवार दिग्दर्शित 'अथांग' ही वेबसीरिज प्रदर्शित झाली आहे. 'अथांग'मध्ये संदीप खरे, निवेदिता जोशी सराफ, धैर्य घोलप, भाग्यश्री मिलिंद, उर्मिला कोठारे, ऋतुजा बागवे, दीपक कदम, ओमप्रकाश शिंदे, केतकी नारायण, शशांक शेंडे, योगिनी चौक आणि रसिका वखारकर यांच्या यांच्या प्रमुख भूमिका आहेत.