जालना  : जिल्ह्यात कोरोनाचा प्रादुर्भाव दिवसेंदिवस वाढतच चालला आहे. सोमवारी (ता.२५) पुन्हा दहा व्यक्तींचा अहवाल पॉझिटिव्ह आल्याने बाधितांचा आकडा ७१ झाला आहे, तर तीन रुग्णांचे अहवाल सलग दोनदा निगेटिव्ह आल्याने त्यांना घरी सोडण्यात आल्याची माहिती जिल्हा शल्यचिकित्सक डॉ. मधुकर राठोड यांनी दिली आहे. यात कानडगाव (ता. अंबड) येथील दोन, तर एकजण परतूर येथील ३२ वर्षीय युवकाचा समावेश आहे. 

कोरोनाबधितांवर उपचार करण्यात कोविड हॉस्पिटलमधील डॉक्टरांना यश मिळत आहे. त्यामुळे आतापर्यंत आढळून आलेल्या ७१ पैकी १८ रुग्ण बरे झाले आहेत. बाधितांच्या संख्येत सतत वाढ होत असल्याने चिंता वाढली आहे. रविवारी सात नवे रुग्ण आढळून आल्यानंतर सोमवारी पुन्हा दहा व्यक्तींच्या स्वॅब नमुन्याचा अहवाल पॉझिटिव्ह आल्याची माहिती जिल्हा शल्यचिकित्सक डॉ. राठोड यांनी दिली आहे. नव्याने आढळून आलेल्या दहा रुग्णांमध्ये पाच रुग्ण हे जालना शहरातील जुना जालना भागातील एका नामांकित खासगी हॉस्पिटलमधील कर्मचारी आहेत. एक रुग्ण हा एक वर्षाचा मुलगा आहे.

तर जालना तालुक्यातील पीरपिंपळगाव प्राथमिक आरोग्य केंद्राअंतर्गत असलेल्या नूतनवाडी येथील दोन, अंबड तालुक्यातील शिरनेर येथील एक, मंठा तालुक्यातील हनुमंतखेडा, कानडी येथील प्रत्येकी एक रुग्ण आहे. एकूण बाधितांपैकी अठरा रुग्ण कोरोनामुक्त झाल्याने सध्या कोविड हॉस्पिटलमध्ये ५३ रुग्णांवर उपचार सुरू आहेत. 
 
तीन रुग्ण कोरोनामुक्त 
अंबड तालुक्यातील कानडगाव येथे परतलेल्या तिघांपैकी २९ वर्षीय तरुण त्याच्या ५२ वर्षीय आईचा उपचारानंतरचा अहवाल निगेटिव्ह प्राप्त झाल्याने त्यांना सोमवारी घरी सोडण्यात आले. परतूर शहरात मुंबईवरून आलेला ३२ वर्षीय तरुणाचा अहवालही निगेटिव्ह आल्याने त्यालाही सुटी देण्यात आली आहे. 
  
कोरोना मीटर 

• एकूण बाधित - ७१ 
• बरे झालेले - १८ 
• उपचार सुरू असलेले - ५३ 
• मृत्यू - निरंक