पाथरी : आई-वडिलांना न सांभाळणाऱ्या घटना घडत असताना केवळ आईच्या स्मरणार्थ मोदानी बंधूंनी आपल्या मूळगावी गुंज येथे पूर्ण शाळा बांधून दिली आहे. गुरुवारी या नवीन शाळा इमारतीचे लोकार्पण होत आहे.

गुंज (पाथरी) येथे मागील २४ वर्षांपासून चिंतामणी महाराज माध्यमिक विद्यालय ही शैक्षणिक क्षेत्रात उत्कृष्ट कार्य करणारी शाळा आहे. पाचवी ते दहावीपर्यंतच्या या शाळेत गुंज व पंचक्रोशीतील शेकडो विद्यार्थी शिक्षण घेत आहेत; पण शाळेला स्वतःची इमारत नसल्याने जायकवाडीच्या इमारतीत वर्ग भरत असत.

२०१८ मध्ये योगानंद महाराज संस्थानचे राजेशभाई महाराज यांनी दोन एकर जागा शाळेस दान दिली. जागेचा प्रश्न सुटला असला तरी संस्थेला इमारत बांधणीसाठी लागणाऱ्या निधीचा प्रश्न निर्माण झाला होता. त्यामुळे गुंज येथील भूमिपुत्र दिवंगत आसाराम मोदानी यांचे छत्रपती संभाजीनगर स्थित पुत्र बाबूलाल, दयानंद, रामानंद आणि परमानंद मोदानी यांनी आई शांताबाई मोदानी यांच्या स्मरणार्थ संपूर्ण शाळा बांधकाम करण्याचा निर्णय घेत अवघ्या सहा महिन्यांत शाळेला दहा वर्गखोल्या बांधून दिल्या. या उपक्रमाचे कौतुक होत आहे.

मोदानी बंधूंनी गावातील शाळा बांधून देऊन गुंजसह आजूबाजूच्या गावांतील मुला-मुलींच्या भविष्याचा प्रश्न मार्गी लावला आहे. याचे सर्व ग्रामस्थांना कौतुक आहे. त्यांचे हे कार्य भावी पिढीसाठी आदर्शवत ठरणार आहे.

- संगीता तांगडे, सरपंच, गुंज