बीड : चोरट्यांनी आता आपला मोर्चा महावितरणच्या वीज पुरवठा करणाऱ्या रोहित्रांकडे वळविला आहे. रोहित्रांतील ऑइल चोरीसह ऑइल सोडून त्याची नासाडी करण्याचे प्रकार शहरात समोर आले आहेत. या प्रकरणी शहर पोलिस ठाणे व पेठ बीड पोलिस ठाण्यांत गुन्हे नोंद करण्यात आले.

सध्या थंडी व हिवाळी भजनांचा हंगाम असल्याने विजेची मागणी वाढली आहे. त्यातच आता चोरट्यांनीही रोहित्रांनाच लक्ष्य केल्याने महावितरणलाच शॉक बसला आहे. दरम्यान, शहरातील जालना रोडवरील सेंट अॅन्स स्कूल या कायम वर्दळीच्या ठिकाणी असलेल्या महावितरणच्या रोहित्रातील ४०० लिटर ऑइल चोरट्यांनी लंपास केले.

विशेष म्हणजे वीजपुरवठा सुरु असताना चोरट्यांनी हे कृत्य केले. याबाबत महावितरणचे सहायक अभियंता संतोष राठोड यांनी शहर पोलिस ठाण्यात फिर्याद दिली. ३६ हजारांच्या ऑइल चोरीचा यात उल्लेख आहे.

तर, यानंतर आता पेठ बीड पोलिस ठाणे हद्दीतील तिरुमला उद्योगाच्या बाजूला असलेल्या २०० केव्हीए क्षमतेच्या रोहित्रातील तब्बल ६४० लिटर (५७ हजार ६००) रुपयांचे ऑइल चोरट्यांनी नासाडी केले आहे. रोहित्राचा कॉक फिरवून हे ऑइल खाली सोडून देण्यात आले. याबाबत सहायक अभियंता गणेश पारीख यांनी पेठ बीड पोलिस ठाण्यात फिर्याद दिली आहे. यावरुन गुन्हा नोंद करण्यात आला.