वैजापुर : वळण घेताना चालकाचे नियंत्रण सुटल्याने ट्रॅक्टर चक्क 'नांमका'च्या वाहत्या कालव्यात कोसळल्याने दोन चुलत भाऊ पाण्यात पडले. यातील एक जण प्रवाहासोबत वाहुन गेला तर दुसऱ्याने आधार शोधल्याने त्यांचा जीव वाचला. ही दुर्घटना गुरुवारी (ता. १८) सकाळी नऊ वाजेच्या सुमारास तालुक्यातील शिरसगाव शिवारात महालगाव- शिरसगाव रस्त्यावर घडली.‌

मोहन छबु धात्रक (वय ३५, रा.शिरसगाव) हा तरुण पाण्यात कऊटगावच्या दिशेने वाहुन गेला असुन घटनेनंतर सात तासानंतरही त्याचा शोध लागला नव्हता. विरगाव पोलिस ठाण्याचे हेड कॉन्स्टेबल व्ही. एम. बामंदे व जी. आर. थोरात, पोलिस पाटील महेश निंबाळकर यांनी घटनास्थळी भेट देऊन नागरिकांच्या मदतीने शोध कार्य सुरु केले.

या घटनेबाबतची अधिक माहिती अशी की, मोहन धात्रक व त्यांचा चूलत भाऊ अरुण धात्रक हे दोघे गुरुवारी सकाळी नऊ वाजेच्या सुमारास ट्रॅक्टरने महालगावकडुन शिरसगावच्या दिशेने जात होते.‌ या रस्त्याने जात असतांना पुलाजवळ वळण घेतल्यानंतर चालकाचे नियंत्रण सुटले व हा ट्रॅक्टर कालव्यात कोसळला.

सध्या पाटबंधारे विभागाने जलदगती कालव्यातुन पिण्याच्या पाण्याचे आवर्तन सोडले आहे. त्यामुळे कालव्यातुन वेगाने पाण्याचा प्रवाह सुरु आहे.‌ दोघेही पाण्यात पडल्यानंतर अरुण धात्रक याने लगेचच लोखंडी ॲंगलचा आधार घेतल्याने त्याचा जीव वाचला तर मोहन धात्रक हा प्रवाहाबरोबर वाहुन गेला. पोलिसांनी त्यांचे शोध कार्य सुरु केले आहे. या घटनेमुळे शिरसगाव परिसरात हळहळ व्यक्त होत आहे.

शोधकार्य सुरु आहे...

घटनेनंतर पाण्यात वाहून गेलेल्या मोहन धात्रक यांचा शोध घेणे सुरु आहे.मात्र,कालव्यात पाण्याचा वेग अधिक असल्याने तपास कार्यात अडचणी येत असल्याची माहिती विरगाव पोलिस ठाण्याचे पोलिस उपनिरीक्षक शरदचंद्र रोडगे यांनी सांगितले.