अहमदपूर (जि. लातूर) - तालुक्यातील किनगाव येथील दोघांचा अपघाती मृत्यू झाल्याची घटना शुक्रवारी (ता. 10) घडली आहे. किनगाव येथील कपडे इस्त्री करण्याचा व्यवसाय असणारे सूर्यकांत नरहरी गायकवाड (46 वर्ष) व महताब अल्लाबक्ष शेख (39 वर्ष) हे दोघेजण शुक्रवारी सायंकाळी पाच वाजता काही कामानिमित्त किनगाव येथून धर्मापुरीला गेले.काम आटोपून ते परत किनगाव कडे निघाले असता संध्याकाळी आठच्या सुमारास कांगणेवाडी ( ता.अंबाजोगाई) येथे घडलेल्या अपघातात दोघांचा मृत्यू झाला. होंडा कंपनीची मोटारसायकल असून महताब अल्लाबक्ष शेख चालवत होते तर सूर्यकांत गायकवाड मोटारसायकलवर मागे बसले होते.

अपघाताचे कारण अस्पष्ट, अपघात ठिकाणी बैलगाडी

मोटारसायकलला अज्ञात वहानाने धडक देऊन गेले का? हे दोघे स्वता घसरून पडले का ? हे आणखी स्पष्ट झाले नाही तरी या दोघांनी थांबलेल्या बैलगाडीला धक्का दिला असेल असा अंदाज नागरीक व्यक्त करीत आहेत. अहमदपूर- अंबाजोगाई हा रस्ता सिमेंट काॅक्रेटचा झाला आहे.या रस्त्यावरून वहाने वेगाने धावत असल्याने अपघाताचे प्रमाण वाढले आहे. दोघेही मन मिळाऊ स्वभावाचे असल्याने या अचानक झालेल्या अपघाती मृत्यूने हळहळ व्यक्त केली जात असून त्यांच्यावर शनिवारी किनगाव येथे अंतीम संस्कार करण्यात येणार आहेत.