हिंगोली : येथील अप्पर जिल्हाधिकारी प्रकरणातील आरोपींना सोमवारी ता. २० न्यायालयात हजर केले असता न्यायालयाने दोन दिवसाची पोलीस कोठडी सुनावणी आहे. तर तोतया अपर जिल्हाधिकारी व त्याच्या साथीदाराने औरंगाबाद येथील सहा जणांची नोकरीचे आमिष दाखवून फसवणूक केल्याचे उघडकीस आले आहे.

बनावट उत्तरपत्रिका व प्रश्नपत्रिका छापून हिंगोली जिल्ह्यातील १८ ते २० जणांची १.१६ कोटी रुपयांची फसवणूक केल्याने तोतया अपर जिल्हाधिकारी अमोल पजई - मराठे, अनंता कलोरे व अन्य एकावर हिंगोली शहर पोलिस ठाण्यात गुन्हा दाखल झाला होता.

या प्रकरणात पोलिस अधीक्षक जी. श्रीधर, अपर पोलिस अधीक्षक अर्चना पाटील यांच्या मार्गदर्शनाखाली गुन्हे शाखेचे निरीक्षक पंडित कच्छवे, हिंगोली शहर पोलिस ठाण्याचे निरीक्षक एस. एस. आम्ले, सहायक पोलिस निरीक्षक सुनील गोपीनवार,

सहायक पोलिस निरीक्षक सुनील गिरी, उपनिरीक्षक अशोक कांबळे यांच्या पथकाने सोमवारी त्यांची अधिक चौकशी सुरू केली. यामध्ये त्यांनी औरंगाबाद येथील सहा जणांना नोकरी लावण्याचे आमिष दाखवून प्रत्येकी आठ लाख असे सहा जणांकडून ४८ लाख घेतल्याचे स्पष्ट झाले आहे.

औरंगाबाद येथील तरुणांनीही याबाबत स्थानिक गुन्हे शाखेचे कार्यालय गाठून फसवणुकीची माहिती दिली. त्यानंतर आता या प्रकरणात औरंगाबाद येथे गुन्हा दाखल होणार आहे. दरम्यान, पोलिस उपनिरीक्षक श्री. जिव्हारे, गुन्हे शाखेचे जमादार सुनील अंभोरे, संभाजी लकुळे, किशोर सावंत, भगवान आडे, शेख शकील यांच्या पथकाने अमोल पजई वापरत असलेली इनोव्हा कार अकोला येथून जप्त केली.

पोलिसांनी चालकाची चौकशी केली असता तो यापूर्वी पुणे येथे नोकरीला होता. त्या ठिकाणी त्याला १५ हजार रुपये महिना वेतन मिळत होते. मात्र कलोरे याने त्याला २५ हजार रुपयांचे वेतन देण्याचे कबूल केले होते. त्यामुळे एक फेब्रुवारी रोजीच तो चालक म्हणून आला होता. त्याचा या प्रकरणात कुठेही संबंध नसल्याचे सांगितले जात आहे.