परळी वैजनाथ (जि.बीड) : तालुक्याला (Parli Vaijnath) पावसाने जोरदार झोडपले असून सोमवारी (ता.२७) सायंकाळी व मध्यरात्री पडलेल्या पावसामुळे सर्वच नद्यांना पुर आले असून वानटाकळी गावाचा संपर्क तुटला आहे. तर परळी, आंबेजोगाई, परळी बीड ,परळी सोनपेठ रस्ता नद्याला आलेल्या पुरामुळे बंद पडले आहेत. हवामान खात्याने दिलेल्या अंदाजानुसार सोमवारी सायंकाळी व मध्यरात्री (Rain) ते सकाळी ८ पर्यंत पडलेल्या पावसाने तालुक्यात पुर परिस्थिती निर्माण झाली असून अनेक गावातील नद्यांना महापुर आला असून वानटाकळी गावाचा संपर्क तुटला आहे. वानटाकळी (Rain In Beed) येथे सोमवारी झालेल्या पावसाने नदीच्या पाण्याचा गावाला वेढा पडला. गावाच्या परिसरात ३० ते ४० आखाडे आहेत. या आखाड्यात पाणी घुसल्याने रात्री १२ पासून या परिसरातील नागरीकांनी झाडाचा आसरा घेतला.

१० ते १२ नागरिक रात्रभर झाडावर होते. नायब तहसीलदार बाबुराव रुपनर, तलाठी शेख यांनी पहाटे ४ वाजता गाव गाठले व गावातील नागरीकांना सतर्क केले. परिसराची पाहणी करुन अडकलेल्या नागरीकांना गावकऱ्यांच्या सहकार्याने खाली उतरवले. व नायब तहसीलदार व तलाठी गावातील परिस्थिती वर लक्ष ठेवून गावातच तळ ठोकून आहेत. दरम्यान मध्यरात्री झालेल्या पावसाने परळी-आंबेजोगाई रस्ता बंद झाला असून तात्पुरता तयार करण्यात आलेल्या पुलावरून पाणी वाहत आहे. परळी-बीड रस्त्यावर पांगरी गावाजवळील ओढ्याचे पाणी परळी-बीड राज्य रस्त्यावरुन वाहत असल्याने हा रस्ता वाहतुकीसाठी बंद आहे. तर संगम येथील नदीला पुर आल्याने परळघ सोनपेठ रस्ता ही बंद आहे. तसेच मलकापूर, गाढे पिंपळगाव, नागापूर आदी गावातील नदीच्या पुलावरून पाणी वाहत आहे.