माजलगाव - येथील कृषी उत्पन्न बाजार समितीअंतर्गत फुले पिंपळगाव शिवारामध्ये व्यापारासाठी तीस वर्षांच्या भाडेपट्ट्यावर (लीज) सहन प्लॉट विक्री करण्यात आली होती. परंतु या गाळेधारकांनी अद्यापपर्यंत गाळ्याची रक्कम न भरल्याने गुरुवारी (ता. २२) बाजार समिती प्रशासनाने १९ प्लॉट जप्त केले आहेत.
येथील बाजार समितीने फुलेपिंपळगाव येथील मोंढ्यामध्ये तीस वर्षासाठी व्यापाऱ्यांना सहन प्लॉट लीजवर दिले होते. या व्यापाऱ्यांनी लीजची रक्कम न भरल्यामुळे व्यापाऱ्यांकडे मोठ्या प्रमाणावर थकबाकी झाली होती. यावर नवनिर्वाचित सभापती अशोक डक यांनी थकबाकीदारांना जाहीर आवाहन करून नोटीस, अंतिम नोटीस, वेळोवेळी कळवूनदेखील व्यापाऱ्यांनी लीज रक्कम भरणा न केल्यामुळे बाजार समिती प्रशासनाने गुरुवारी १९ प्लॉट जप्त केले आहेत. उर्वरित व्यापाऱ्यांनी लीज रक्कम अदा न केल्यास ही कारवाई सुरूच राहील, असे सचिव डी. बी. फुके यांनी सांगितले आहे. यावेळी पंचनामा करताना बाजार समितीचे एच. एन. सवणे, बंडू वाघमारे, ए. डी. आगे, एस. एम. येवले यांचा समावेश होता.
बाजार समितीवर दोन कोटी रुपयांचे कर्ज आहे. फुलेपिंपळगाव शिवारामध्ये व्यापाऱ्यांसाठी दिलेल्या प्लॉटधारकांकडे मोठ्या प्रमाणावर थकबाकी आहे. बाजार समिती कर्जमुक्त करण्यासाठी प्रशासनाने कारवाई सुरू केली आहे. व्यापाऱ्यांनी थकबाकी भरणा करून बाजार समिती प्रशासनास सहकार्य करावे.
- अशोक डक, सभापती, बाजार समिती, माजलगाव
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.