औरंगाबाद - सर्वत्र दमदार पावसाची प्रतीक्षा असताना रविवारी (ता. ३०) सकाळी साडेआठ वाजेपर्यंत शहरात १७.९, तर त्यानंतर फक्त ३.४ मिलिमीटर पावसाची नोंद चिकलठाणा वेधशाळेत करण्यात आली. शनिवारी मध्यरात्रीपासून हलक्‍या ते मध्यम स्वरूपाच्या पावसाला सुरवात झाली होती. ती सकाळपर्यंत कायम राहिल्याने शेतकऱ्यांसह सर्वांना दिलासा मिळाला. 

यंदा मॉन्सूनचे उशिरा आगमन झाल्याने शहरासह जिल्ह्यातही पाऊस लांबला. दरम्यान, शनिवारी मध्यरात्रीपासून सकाळपर्यंत शहरात सर्वत्र पावसाची रिमझिम होती. अनेकजण रेनकोट घालून, तर काहीजण छत्र्या घेऊन मॉर्निंग वॉकला गेले. पहाटेच्या वेळेस शहरात हलका ते मध्यम स्वरूपाचा पाऊस झाला. सकाळी शहरात ३.४ मिलिमीटर पाऊस पडला. सकाळी दहानंतर शहरात पाऊस पडला नाही.