'छत्रपती शिवाजी महाराजांचा अपमान करणारा नेता नको'; राहुल गांधींचा व्हिडिओ का होतोय ट्रेंड?

नवी दिल्ली- लोकसभा निवडणुकीची रणधुमाळी सुरु आहे. सत्ताधारी आणि विरोधक एकमेकांवर आरोप करण्याची एकही संधी सोडत नाहीयेत. त्यातच सोशल मिडिया प्लॅटफॉर्म 'एक्स' वर काँग्रेसचे माजी अध्यक्ष राहुल गांधी यांचा एक व्हिडिओ ट्रेंड होत आहे. राहुल गांधी यांनी छत्रपती शिवाजी महाराज यांचा अपमान केला असा दावा काही नेटकरी करत आहेत.

राहुल गांधी पुण्यातील सभेसाठी आले होते. यावेळी काँग्रेसचे पुण्याचे उमेदवार रविंद्र धंगेकर आणि काँग्रेस प्रदेशाध्यक्ष नाना पटोले हे देखील व्यासपीठावर उपस्थित होते. अशावेळी राहुल गांधी यांना शिवाजी महाराजांची मूर्ती भेट देण्यात येते. राहुल गांधी यांनी मूर्तीचा उचित सन्मान केला नाही असा दावा नेटकऱ्यांनी केला आहे.

'एक्स'वर अनेकांनी राहुल गांधी यांचा व्हिडिओ शेअर केला आहे. यामध्ये जास्त करुन भाजपशी संबंधित नेते आणि कार्यकर्त्यांचा समावेश आहे. छत्रपती शिवाजी महाराज यांचा अनादर करणाऱ्या नेत्यांना तुम्ही निवडून देणार का? असा सवाल नेटकऱ्यांनी केला आहे. याशिवाय राहुल गांधी यांच्यावर कडवट टीका देखील केली आहे.

व्हिडिओमध्ये दिसतंय की, राहुल गांधी यांना शिवाजी महाराजांची मूर्ती भेट देण्यात येते. याचवेळी रविंद्र धंगेकर त्यांच्याशी बोलत असतात. राहुल गांधी मूर्ती दुसरीकडे ठेवण्यास सांगतात. या मुद्द्यावरुन विरोधक आक्रमक होण्याची शक्यता आहे. त्यामुळे राजकीय वातावरण आणखी तापलं जाण्याची शक्यता आहे.

पुणे लोकसभा मतदारसंघाचे काँग्रेसचे उमेदवार रविंद्र धंगेकर यांच्या प्रचारासाठी राहुल गांधी यांनी पुण्यात सभा घेतली होती. यावेळी राहुल गांधी यांनी पंतप्रधान नरेंद्र मोदी आणि भारतीय जनता पक्षावर जोरदार हल्लाबोल केला होता. लोकसभा निवडणुकीच्या पार्श्वभूमीवर भाजप आणि काँग्रेसमध्ये चांगलाच कलगीतुरा रंगल्याचं पाहायला मिळत आहे.