औरंगाबाद : भरधाव कारच्या धडकेत रिक्षाचालक ठार झाला. या अपघातात तीन वाहनांचा चुराडा झाला. हा अपघात नारेगाव कचरापट्टीजवळ रविवारी सकाळी आठच्या सुमारास घडला.

हैदरशहा इब्राहीम शहा (वय ३०, रा. नारेगाव) हा रिक्षाचालक रविवारी सकाळी आठच्या सुमारास त्याचा रिक्षा (एमएच-२०-ई- ९१८३) यामध्ये गॅस भरण्यासाठी नारेगावकडून केंब्रिज शाळेकडे जात होता. त्यावेळी नारेगावजवळील कचरापट्टीजवळ हैदरच्या रिक्षाच्या पाठीमागून भरधाव वेगातील स्कार्पिओने जोरदार धडक दिली. यामुळे रिक्षाचा चुराडा झाला. त्यानंतर स्कॉर्पिओ ही रस्त्याच्या कडेला उभ्या असलेल्या आयशर ट्रकवर आदळली.

यामध्ये रिक्षाचालक हैदरशहा इब्राहिम शहा हा ठार झाला. या प्रकरणी मृत रिक्षाचालकाचा भाऊ उस्मान शहा इब्राहिम शहा यांच्या तक्रारीवरून स्कॉर्पिओचालक शेख शफिक शेख रज्जाक याच्याविरोधात गुन्हा दाखल करण्यात आला. पोलिस उपनिरीक्षक श्री. घुगे हे तपास करत आहेत.