औरंगाबाद : कोरोना प्रतिबंधक लसीकरणाची मंदावलेली गती वाढविण्यासाठी प्रशासनातर्फे विविध प्रयोग केले जात आहेत. आता दुसरा डोस न घेणाऱ्यांना घरी जाऊन लस दिली जाणार आहे. तसेच पवित्र रमजानमुळे तीन आरोग्य केंद्र व दोन दुकानांमध्ये सायंकाळी चार ते रात्री १० दहा या काळात लसीकरण सुरु ठेवण्याचा निर्णय महापालिकेने घेतला आहे. आरोग्य वैद्यकीय अधिकारी डॉ. पारस मंडलेचा यांच्या उपस्थितीत शनिवारी बैठक घेण्यात आली. त्यात हा निर्णय घेण्यात आला.

कोरोना प्रतिबंधक लसीकरणाची गती सध्या मंदावली आहे. शहरात ८० टक्के लसीकरण झाले आहे. मात्र पहिला डोस ९० टक्के तर दुसरा डोस ७० टक्के नागरिकांना द्यावा लागणार आहे. याअनुषंगाने प्रशासक आस्तिककुमार पांडेय यांच्या मार्गदर्शनाखाली शनिवारी आरोग्य वैद्यकीय अधिकारी डॉ. पारस मंडलेचा यांनी ४० आरोग्य केंद्रातील वैद्यकीय अधिकारी, परिचारिका, डाटा एंन्ट्री ऑपरेटर यांची बैठक घेतली. पवित्र रमजान महिना सुरू आहे. त्यामुळे सायंकाळनंतर लस उपलब्ध व्‍हावी यासाठी सिडको एन-८ रुग्णालय, सिल्क मिल कॉलनी रुग्णालय, कैसर कॉलनी रुग्णालयात सायंकाळी चार ते रात्री १० वाजेपर्यंत लसीकरण सुरु ठेवण्याचा निर्णय बैठकीत घेण्यात आला. त्यासोबतच पैठणगेट येथील फॅशन बाजार व सिटीचौकातील सामी कटपीस सेंटर या दोन ठिकाणी सायंकाळी चार ते रात्री १० वाजेपर्यंत लसीकरण केले जाणार आहे.

नावांची यादी तयार

दुसरा डोस न घेणाऱ्यांची यादी तयार करण्यात आली असून, ती यादी आरोग्य केंद्रनिहाय वैद्यकीय अधिकाऱ्यांना देण्यात आली आहे. या नागरिकांना आता घरी जाऊन लसीकरण केले जाणार असल्याचे डॉ. पारस मंडलेचा यांनी सांगितले.