औरंगाबाद : शिवाजीनगर रेल्वेफाटकाला पुन्हा वाहनाने बुधवारी (ता. सहा) सात वाजेच्या सुमारास धडक दिली. यामुळे रेल्वेफाटक नादुरुस्त झाल्याने सातारा, देवळाई आणि बीड बायपासकडे जाणाऱ्या वाहनधारकांना प्रचंड मनस्ताप सहन करावा लागला. संग्रामनगर उड्डाण पुलावर ट्राफिक जाम झाली, त्यातच पावसाची रिपरिप सुरु असल्याने वाहनधारकांना मार्ग काढताना प्रचंड त्रास सहन करावा लागला. रात्रीचे १० वाजेनंतरही रेल्वेगेटच्या दुरुस्तीचे काम सुरूच होते.

जयपूर-नांदेड एक्स्प्रेस रवाना होण्यासाठी शिवाजीनगर रेल्वेगेट सायंकाळी ७ वाजेच्या सुमारास बंद करण्यात आले होते. याच वेळी एका मालवाहू वाहनाने गेटला धडक दिली. त्यामुळे गेट नादुरुस्त झाल्याने बंद पडले. यामुळे रस्त्याच्या दोन्ही बाजूने वाहनांच्या लांबच लांब रांगा लागल्या होत्या. प्रत्येक वाहनधारक रेल्वेगेटकडे जाण्यासाठी गेटपर्यंत पोहोचत होते; परंतु गेट बंद असल्याचे लक्षात येताच त्यांना माघारी फिरावे लागत होते. शिवाजीनगर येथेही वाहनांच्या रांगा लागल्या होत्या, त्यानंतर जवळचा एकमेव मार्ग असलेल्या संग्रामनगर उड्डाणपुलावरही वाहतूक जाम झाली. रात्री उशिरापर्यंत गेटच्या दुरुस्तीचे काम सुरू होते. पुलाच्या दोन्ही बाजूने आणि बीडबायपास रस्त्यावरही वाहनेच वाहने दिसत होते. वाहनांची कोंडी त्यातच पावसाची रिपरिप यामुळे मार्ग काढताना वाहनधारकांची दमछाक होत होती.