शिऊर : व्हॉटस्ॲप या सोशल मीडियावर ‘सॉरी भावांनो’ असा स्टेटस ठेवून २१ वर्षीय तरुणाने शेतातील लिंबाच्या झाडाला दोरीच्या सहाय्याने गळफास घेऊन आत्महत्या केल्याची घटना अक्षय तृतीयेच्या पूर्वसंध्येला शिऊर (ता.वैजापूर) येथे घडली.

ज्ञानेश्वर कैलास चव्हाण (वय १९) असे आत्महत्या केलेल्या तरुणाचे नाव आहे. सोमवारी रोजी रात्री आठ ते नऊ वाजेच्या दरम्यान ज्ञानेश्वर हा घरात कुणाला काही न सांगता घराबाहेर पडला होता. तो थेट स्व तः च्या शेतात गेला. येथे त्याने लिंबाच्या झाडाला दोरीने गळफास घेऊन जीवनयात्रा संपविली. त्यापूर्वी त्याने व्हॉटस्ॲपवर ‘सॉरी भावांनो’ असा स्टेटस ठेवले होते. त्याचे स्टेटस पाहून कुटुंबीयासह ग्रामस्थांनी त्याचा गावात शोध घेतला. मात्र, तो मिळून आला नाही. यानंतर काहींनी शेतात धाव घेतली असता दरम्यान,त्याचा मृतदेह शेतात लिंबाच्या झाडाला लटकलेल्या अवस्थेत आढळला.

माहिती मिळताच पोलिसांनी घटनेचा पंचनामा करून मृतदेहावर शिऊरच्या प्राथमिक आरोग्य केंद्रात शवविच्छेदन करून शिऊर पोलिसात अकस्मात मृत्यूची नोंद करण्यात आली. पुढील तपास सहाय्यक फौजदार रामचंद्र जाधव हे करीत आहे.

आत्महत्येचे कारण अस्पष्ट

सदर तरुणाने आत्महत्या का केली याचे कारण अद्याप स्पष्ट होऊ शकले नाही. तरी तो गेल्या काही दिवसांपासून तणावात असल्याचे त्याच्या मित्र, परिवाराने सांगितले.