छत्रपती संभाजीनगर - संसदेत महिला विधेयकाविरोधात मतदान करणाऱ्या एमआयएमचे सर्वेसर्वा असदुद्दीन आणि छत्रपती संभाजीनगरचे खासदार इम्तियाज जलील यांच्याविरोधात भाजप महिला मोर्चातर्फे रविवारी क्रांती चौकात जोरदार आंदोलन करण्यात आले. आक्रमक महिलांनी खासदार इम्तियाज जलील यांच्या पुतळ्यास बांगड्या भरल्या.

भाजपचे शहराध्यक्ष शिरीष बोराळकर, अमृता पालोदकर, माधुरी अदवंत यांच्या मार्गदर्शनाखाली हे आंदोलन करण्यात आले. लोकसभेत पंतप्रधान नरेंद्र मोदी यांच्या नेतृत्वातील सरकारने सादर केलेल्या ‘नारीशक्ती वंदन’ विधेयक प्रचंड बहुमताने संमत झाले. परंतु विरोधात दोन मते पडली.

त्यामध्ये खासदार इम्तियाज जलील यांचा समावेश होता. त्यामुळे महिला मोर्चातर्फे आंदोलन करण्यात आले. खासदार इम्तियाज यांच्याविरोधात घोषणा देवून तसेच त्यांच्या पुतळ्याला बांगड्या घालून निषेध व्यक्त करण्यात आला. आंदोलनास श्री. बोराळकर, भाजप प्रदेश सरचिटणीस मीना मिसाळ, शालिनी बुंधे, लता दलाल, वर्षा साळुंके, वंदना शहा, गीता कापुरे, गीता आचार्य, मीना खरे,

उज्ज्वला दहिफळे, सुप्रिया चव्हाण, मनिषा मुंडे, पूजा सोनवणे, जयश्री दाभाडे, सुवर्णा धानोरकर, रेखा जैस्वाल, मीरा काळे, प्रतिभा जऱ्हाड, जान्हवी पाटील, रुपाली धर्माधिकारी, अपर्णा चौबे, पुनम राजपूत, हाफीज शेख, लक्ष्मीकांत थिटे, कुणाल मराठे, सिद्धार्थ साळवे, प्रवीण कुलकर्णी आदी उपस्थित होते.