औरंगाबाद : शहरात कोरोना रुग्णांची संख्या दिवसेंदिवस वाढत आहे. त्यामुळे कोरोना रुग्णांनी कोविड केअर सेंटरसह डीसीएच, डीसीएचसी सेंटरही फुल्ल झाले आहेत.शहरातील अनेक नागरिकांकडून नियम पाळले जात नसल्यामुळे कोरोनाचा फैलाव झपाट्याने होत आहे. कोरोना रुग्णांमध्ये सर्वाधिक १८ ते ५० वयोगटातील तरुणांचा समावेश आहे.

मेल्ट्रॉन, एमआयटी, एमजीएम, किलेअर्क सिपेट, देवगिरी महाविद्यालय, शासकीय अभियांत्रिकी महाविद्यालय, पदमपुरा या कोविड सेंटरमध्ये रुग्णांसाठी बेड शिल्लक राहत नाही. त्यासोबतच शासकीय रुग्णालयासह खासगी रुग्णालय, डीसीएच, डीसीएचसीमध्येही कोरोना रुग्ण दाखल झालेले आहेत. कोरोना रुग्णमुक्त होण्याच्या संख्येपेक्षा दाखल होणाऱ्या रुग्णांची संख्या वाढतच आहे.

CoronaUpdate:औरंगाबादेत २१४ जण पॉझिटिव्ह, जिल्ह्यात २६ हजार ११६ झाले बरे

महापालिकेने शनिवारी दिलेल्या अहवालात शहरातील कोविड केअर सेंटर, शासकीय रुग्णालय, डीसीएच, डीसीएचसीसह खासगी रुग्णालय मिळून ४६ रुग्णालयांत चार हजार ७३७ कोरोना रुग्ण उपचारासाठी दाखल असून, त्यात २४५ रुग्णांची भर पडली आहे. रविवारीदेखील दोनशे रुग्ण दिवसभरात दाखल झाल्याने कोरोना रुग्णांचा आकडा पाच हजारांवर पोचला आहे.

खासगी रुग्णालयेदेखील कोरोना रुग्णांनी भरले आहेत. शहरात कोरोना रुग्ण वाढत असल्यामुळे त्यांच्यावर उपचार करण्यासाठी महापालिका व जिल्हा प्रशासनाने तातडीने व्यवस्था करण्याची तयारी सुरू केली आहे. खासगी रुग्णालयातील बेड उपलब्ध करून दिले जाणार असून, ऑक्सिजनच्या बेडची व्यवस्था करण्याचे काम हाती घेण्यात आले आहे.

संपादन - गणेश पिटेकर