औरंगाबाद: शहारातील दुर्धर आजारी, दिव्यांग तसेच अंथरुणावर पडून असलेल्या व्यक्तींचे कोरोनाप्रतिबंधक लसीकरण घरोघरी जाऊन केले जाणार आहे. त्यापूर्वी अशा नागरिकांच्या नोंदी करून घेतल्या जाणार आहेत. करण्याचा निर्णय महापालिकेने घेतला आहे. त्यानुसार लसीकरणासाठी लवकरच सर्वेक्षण केले जाणार आहे. नागरिकांनी अशा १८ वर्षावरिल व्यक्तिंची जवळच्या महापालिकेच्या आरोग्य केंद्रावर नोंद करावी, असे आवाहन आरोग्य वैद्यकीय अधिकारी डॉ. नीता पाडळकर यांनी केले आहे.

महापालिकेने शहरात आतापर्यंत सहा लाख नागरिकांचे लसीकरण पूर्ण केले आहे. चार लाख २५ हजार ४३१ जणांना पहिला तर एक लाख ७५ हजार ६८५ नागरिकांना दुसरा डोस देण्यात आला आहे. दरम्यान लसींचा तुटवडा असल्यामुळे लसीकरणाची गती मंदावली आहे. दरम्यान शहरातील दुर्धर आजारी, अंथरूनावर पडून असलेल्या व्यक्तींचेही लसीकरण करण्याचा निर्णय महापालिकेने घेतला आहे. याविषयी डॉ. नीता पाडळकर यांनी सांगितले की, शहरातील अशा व्यक्तींच्या नातेवाईकांनी महापालिकेच्या जवळच्या आरोग्य केंद्रावर जाऊन त्यांची नाव नोंदणी करावी. त्यानंतर महापालिकेचे मोबाईल पथक अशा व्यक्तींच्या घरी जाऊन लसीकरण करेल. या पथकामध्ये डॉक्टर, व्हॅक्सिनेटर, कोविन अ‍ॅपवर नोंदणी करणारा ऑपरेटर यांचा समावेश असेल.

खासगी डॉक्टरला घ्यावी लागणार जबाबदारी
लसीकरण केल्यानंतर अर्धा तास संबधिताला देखरेखीखाली ठेवले जाते. महापालिकेच्या पथकाला प्रत्येकाच्या घरी अर्धातास थांबणे शक्य नाही. त्यामुळे लस घेतल्यानंतर संबधित व्यक्तिवर लक्ष ठेवण्यासाठी फॅमिला डॉक्टरला अर्धातास थांबावे लागणार आहे, असे डॉ. पाडळकर यांनी सांगितले.