छत्रपती संभाजीनगर : माजी महापौर नंदकुमार घोडेले यांनी दारासमोर ठेवलेला १५ हजारांचा बूट मोकाट श्‍वानाने चोरला अन् महापालिकेची यंत्रणा ‘तो’ श्‍वान शोधण्याच्या कामाला लागल्याचा प्रकार समोर आला आहे. तीन श्‍वानांना पकडल्यानंतर नेमका बूट कोणत्या श्‍वानाने चोरला हे मात्र गुलदस्त्यातच राहिले!

माजी महापौर नंदकुमार घोडेले यांचे इटखेडा भागात निवासस्थान आहे. शनिवारी रात्री ते घरी आले. नेहमीप्रमाणे आपला बूट दारासमोर काढला व ते झोपी गेले. सकाळी पाहतात तर एक बूट गायब झाला. त्यामुळे शोधाशोध सुरू झाली. सीसीटीव्हीच्या तपासणीनंतर बूट कुत्र्याने नेल्याचे समोर आले. त्यामुळे श्री. घोडेले यांनी महापालिकेच्या पशुसंवर्धन विभागाला फोन करून परिसरात मोकाट श्‍वान वाढले असून, त्यांचा बंदोबस्त करावा, अशी सूचना करत बूटच श्‍वानाने नेल्याचे सांगितले.

त्यानुसार तातडीने श्‍वान पकडणारी गाडी इटखेडा भागात आली. त्यांनी मोकाट श्‍वानांचा शोध घेत तीन श्‍वानांना पकडले, पण महापौरांचा बूट काही सापडला नाही. या तीनही श्‍वानांना कोंडवाड्यात पाठविण्यात आले. श्‍वानाने नेलेला श्री. घोडेले यांचा बूट १५ हजार रुपये किमतीचा होता आणि तो त्यांनी काही दिवसांपूर्वीच खरेदी केला होता.

यासंदर्भात श्री. घोडेले यांनी सांगितले की, बूट गेला पण, त्यापेक्षा परिसरातील नागरिकांना मोकाट श्‍वानांचा जास्त त्रास सहन करावा लागत आहे. त्यामुळे मोकाट श्‍वानांचा बंदोबस्त करण्यासाठी पथकाला बोलविले होते.