औरंगाबाद: मध्यवर्ती बसस्थानकात औरंगाबाद-पुणे शिवशाही बसमध्ये बसलेला एक प्रवासी वारंवार बसमधून खाली आणि पुन्हा बस मध्ये बसत होता. हा प्रकार जवळपास दहा वेळा त्याने केला. यावर बसचे चालक सिद्धार्थ गायकवाड यांनी प्रवासाची विचारपूस केली असता, सदरील प्रवासी हा भोळसर असून तो रागा-रागाने घर सोडून बाहेर निघाला होता. या चालकाने त्यास विश्‍वासात घेत त्याच्या घरच्यांची संपर्क साधत त्याला कुटुंबीयापर्यंत सुखरूप पोचविले. ज्या चालकांचा तीन महिन्यापासून पगार झाला नाही, त्यांनी माणुसकी दाखवित या युवकाचे तिकिट काढत त्याला घरापर्यंत सोडून माणुसकीचा आदर्श घालून दिला.

मध्यवर्ती बसस्थानकात चालक म्हणून कार्यरत असलेले सिद्धार्थ गायकवाड यांनी सांगितले की, मध्यवर्ती बसस्थानकावरील प्लॉटफॉर्मवर एक वर मंगळवारी रात्री साडेसातच्या दरम्यान पुणे-औरंगाबाद शिवशाही बस लागली होती. या बसमध्ये अमोल हा वारंवार बसमध्ये येऊन बसायचा व खाली उतरायचा. असे दहा वेळेस त्याने केले. त्यामुळे मी त्याला जाऊन विचारले, कुठे जायचे आहे? पण तो काही सांगत नव्हता. थोड्या वेळाने त्यांने सांगितले की माझ्या घरच्यांना एक फोन लावायचा आहे. तुमचा फोन देता का?

त्यावर गायकवाड यांनी संबंधित व्यक्तीच्या घरी फोन लावून दिला असता त्याच्या आईने सांगितले की सदरील मुलगा असून तो कुटुंबीयांना सोडून गेल्या आठ दिवसापासून घराबाहेर निघून गेला आहे. या विषयी आम्ही शिरूर पोलिस ठाण्यात हरविल्याचीही तक्रार नोंदविली आहे. तुम्ही कृपया त्याला घरी आणा, असे विनंती त्या युवकाच्या आईने रडत रडत सिद्धार्थ यांच्याकडे केली. सदरील युवकाकडे तिकिटासाठी पैसे नव्हते, त्यामुळे आम्ही त्याला तिकिटाचे पैसे दिले व शिरूरकडे त्याच्या कुटुंबीयांकडे नेऊन सोडले, असेही सिद्धार्थ गायकवाड यांनी सांगितले. कुटुंबीयांना अमोलला पाहिल्यानंतर मोठा आनंद झाला. त्याच्या आईने आमचे आभार मानल्याचेही श्री. गायकवाड यांनी सांगितले.