उस्मानाबाद : जिल्हा मध्यवर्ती सहकारी बँकेच्या दहा जागांसाठी रविवारी (ता. २०) आठ केंद्रावर मतदान होणार आहे. त्यानुसार नियोजन पूर्ण झाल्याची माहिती निवडणूक निर्णय अधिकारी सुनील शिरापूरकर यांनी दिली. मतदान केंद्राच्या व्यवस्थापनासाठी ६० ते ६२ लोकांची नियुक्ती करण्यात आली असून, सकाळी आठ ते संध्याकाळी चार वाजेपर्यंत मतदानासाठी वेळ देण्यात आला आहे.

जिल्हा बँकेची आता दहा जागेसाठी निवडणूक होत आहे. उमेदवारी अर्ज माघारी घेण्याच्या शेवटच्या दिवसापर्यंत पाच जागा बिनविरोध निघाल्या. जिल्ह्यातील ८०८ मतदार बँक कोणाच्या ताब्यात द्यायची हे ठरविणार आहेत, पहिल्यांदा एकतर्फी वाटणाऱ्या निवडणुकीत नंतर मात्र चुरस निर्माण झाली. महाविकास आघाडी विरुद्ध भाजप अशी थेट लढत होत असली तरी अंतर्गत घडामोडीचा निवडणुकीवर किती परिणाम होणार, हे पाहावे लागणार आहे. लढतीमध्ये नेमका कोणाचा विजय होणार हे आता सोमवारी निकालानंतरच कळणार आहे. त्यासाठी रविवारी मतदान आपल्याकडे खेचण्यासाठी दोन्ही पॅनेलकडून शेवटच्या दिवसापर्यंत प्रयत्न सुरू होते.