पैठण - गणपती बाप्पांचे आगमन मंगळवारी (ता.१९) होत आहे. या निमित्त शहरातील बाजारपेठेत उत्साह संचारला आहे. सजावट साहित्यांनी दुकाने गजबजून गेली आहेत. घराघरांतही गणेशमूर्तीला सजविण्याची तयारी चालू आहे.

यंदा गणेशमूर्ती महागल्या असून पण सजावट साहित्याचे दरही २० ते २५ टक्क्यांनी वाढले असून शिवाय गणपतीच्या आरासासाठी लागणाऱ्या साहित्याचे भावही वाढल्याने गणेश भक्तांचा खिसा रिकामा होणार आहे. पैठण शहरासह ‌‌ विविध रोडवर १०० हून अधिक वेगवेगळे आकर्षण असलेले बाप्पांच्या मूर्तीचे स्टॉल लागले आहे.

गतवर्षीपेक्षा यावर्षी गणेश मूर्तीची किंमत २० ते २५ टक्क्यांनी वाढली आहे. सध्या फेटेवाले बाप्पांचे सर्वांनाच आकर्षण आहे. विशेषत: गणेश मूर्तीच्या अंगावर सदरा, जरीचा शेला, फेटा असे वस्त्र असलेले बाप्पांच्या मूर्ती मोठ्या प्रमाणात उपलब्ध आहेत. त्याचबरोबर लालबाग गणपती याही मूर्तींना मोठी मागणी आहे. त्यामुळे पैठण शहर परिसरात गणेशोत्सवाचा चांगला उत्साह दिसून आला.