छत्रपती संभाजीनगर मध्यवर्ती बसस्थानकात होणाऱ्या चोऱ्यांबद्दल दैनिक ‘सकाळ’ने शनिवारच्या अंकातून मुद्दा उपस्थित केला होता. यावर पोलिस प्रशासन खडबडून जागे झाले. या वृत्ताची गंभीर दखल घेत शनिवारी वरिष्ठ पोलिस अधिकाऱ्यांनी बसस्थानक गाठत सर्वत्र झाडाझडती घेतली. एसटी प्रशासन आणि हॉकर्सची बैठक घेत यावेळी चोऱ्या टाळण्यासाठी कडक सूचना करण्यात आल्या.

गुरुवारी सायंकाळी चोरट्यांनी अवघ्या दोन तासांत तीन घटनांमध्ये ‘हात की सफाई’ करत ४ प्रवाशांचे ऐवज लंपास केले होते. यापूर्वी देखील या परिसरात प्रवाशांचा ऐवज लांबवण्याचे प्रकार घडले आहेत. ‘सकाळ’ने या प्रकरणी सविस्तर वृत्त प्रसिद्ध केले. चोरट्यांना येथील काही अवैध विक्रेते देखील मदत करत असल्याचे खात्रीशीर सूत्रांनी सांगितले आहे. हे वृत प्रसिद्ध होताच दुसऱ्या दिवशी शहर विभागाचे सहायक पोलिस आयुक्त संपत शिंदे, क्रांती चौक पोलिस ठाण्याचे पोलिस निरीक्षक संतोष पाटील यांनी गुन्हे प्रकटीकरण पथकासह मध्यवर्ती बसस्थानक गाठले. पोलिस चौकी, परिसरातील सीसीटीव्ही कॅमेरे यांची पाहणी करण्यात आली. या पाहणीनंतर प्रवाशांनी ‘देर आये, दुरुस्त आये’, अशी प्रतिक्रिया व्यक्त केली.

यापुढे २४ तास पोलिसांचा वावर

बसस्थानक परिसरात पोलिस चौकी आहे. मात्र, या ठिकाणी अनेकदा चौकीत कोणी नसल्याची प्रवाशांची तक्रार होती. या अनुषंगाने देखील पोलिस अधिकाऱ्यांनी येथे नेमणुकीस असलेल्या पोलिस कर्मचाऱ्यांना चांगलेच फैलावर घेतले. नियुक्त पोलिसांना चौकीत थांबण्याचे तसेच पेट्रोलिंग करण्याचे आदेश देण्यात आले. गुन्हे प्रकटीकरण पथकाचे देखील कर्मचारी आता बसस्थानक परिसरात गस्तीसाठी नेमण्यात आले आहेत.

एसटी अधिकारी, हॉकर्सची बैठक घेत सूचना

एसीपी संपत शिंदे आणि निरीक्षक पाटील यांनी चोऱ्या रोखण्यासंदर्भात एसटी प्रशासनातील अधिकाऱ्यांची देखील बैठक घेतली. अधिकृत हॉकर्स, फेरीवाले यांची यादी मागवण्यात आली. अनधिकृत फेरीवाले, ट्रॅव्हल्स एजंट, खासगी दलाल परिसरात फिरताना आढळून आल्यास कडक कारवाई करण्याच्या सूचना या बैठकीत पोलिस अधिकाऱ्यांनी संबंधितांना दिल्या.

मध्यवर्ती बसस्थानकाला आज भेट देत तेथील पाहणी केली. बंदोबस्त कसा आहे, कर्मचारी किती आहे याची चौकशी केली. डेपो मॅनेजर आणि पोलिस निरिक्षकांना गुन्हे रोखण्याबाबत सूचना करण्यात आल्या.

— संपत शिंदे,

सहायक पोलिस आयुक्त