वाळूज महानगर : येथील साजापूर, क्रांतिनगरमधील बालाजीनगर येथे एका लघू उद्योजकाची डोक्यात गोळी घालून हत्या करण्यात आली. ही घटना रविवारी (ता. १७) रात्री आठच्या सुमारास घडली. सचिन साहेबराव नरोडे (वय ३५) असे मृताचे नाव आहे.

नरोडे हे मूळ शिल्लेगाव (ता. गंगापूर) येथील रहिवासी आहेत. ते साजापूर येथे आई शोभाबाई, वडील साहेबराव आणि मुलगी स्वरांजली (वय ११) यांच्यासोबत राहात होते. त्यांचा वडगाव येथे स्वयंपाकाची शेगडी बनविण्याचा लघुउद्योग आहे.

रविवारी रात्री आठच्या सुमारास नरोडे यांच्या मोबाइलवर एका व्यक्तीचा कॉल आला. तिने त्यांना घराबाहेर बोलावले. यावेळी वीजपुरवठा खंडित झालेला होता. नरोडे घराबाहेर पडल्यानंतर घरापासून दीडशे फूट अंतर चालत गेल्यावर मोकळ्या मैदानात संबंधित व्यक्तीने नरोडे यांच्या डोक्यात पिस्तूलमधून गोळी झाडली.

नरोडे खाली कोसळताच मारेकऱ्याने घटनास्थळावरून पळ काढला. दरम्यान, गोळी झाडल्याचा मोठा आवाज आला. तो ऐकून परिसरातील नागरिक घराबाहेर आले. त्यांना नरोडे रक्ताच्या थारोळ्यात पडलेले दिसले. घटनास्थळावरच नरोडे यांचा मृत्यू झाला.

वाळूज एमआयडीसी ठाण्याचे निरीक्षक कृष्णा शिंदे, गुन्हे शाखेचे निरीक्षक संदीप गुरमे, उपनिरीक्षक प्रवीण पाथरकर, संदीप शिंदे यांनी घटनास्थळ गाठून तपास सुरू केला. रात्री उशिरा पोलिस उपायुक्त मनोज लोहिया, पोलिस उपायुक्त नितीन बगाटे व पोलिस उपायुक्त महेंद्र देशमुख यांनीही घटनास्थळी भेट दिली.

खून करणारे दोघे?

नरोडे यांचा शेगडी बनविण्याचा उद्योग आहे. पण, महिनाभरापासून तो बंद असल्याची माहिती सूत्रांनी दिली. दुचाकीवरून आलेल्या दोघांनी मिळून हा खून केल्याचा संशय आहे. घटनेच्या वेळी परिसरातील वीजपुरवठा खंडित झालेला होता.

त्यामुळे मारेकरी कोण आहेत, ते कोणत्या दिशेने पळाले, हे कळाले नाही. दरम्यान, श्वान पथकाच्या मदतीने पोलिसांनी मारेकऱ्यांचा माग काढण्याचा प्रयत्न केला. पण, धुळे-सोलापूर मार्गापर्यंत जाऊन श्वान घुटमळले. नरोडे यांना आलेल्या फोन कॉलच्या मदतीने पोलिस खुन्यांचा शोध घेत आहेत.