औरंगाबाद : येळकोट येळकोट ‘जय मल्हार’, ‘मल्हारी मार्तंड’ की जय च्या जयघोषात हळदीच्या भंडाऱ्याची उधळण करीत ‘खंडोबा यात्रोत्सवाला रविवारपासून सुरुवात झाली. सातारा येथील खंडोबा मंदिरात नागवेलीच्या पानावर खंडोबाची घटस्थापना करून पहाटे ५ वाजता महाआरती करण्यात आली. देवदिवाळीला मार्गशीर्ष शुद्ध प्रतिपदेपासून मार्तंड भैरव (खंडोबा) यात्रोत्सवापासून सुरुवात झाली. सातारा येथील खंडोबा मंदिरात पहाटे तीन वाजता मंदिरातील पुजारी विशाल धुमाळ, दिलीप धुमाळ, विजय धुमाळ यांच्या हस्ते खंडोबा मूर्तीला रुद्राभिषेक करून नवीन वस्त्र परिधान करण्यात आले. त्यानंतर नागवेलीच्या पानावर खंडोबाची घटस्थापना करण्यात आली. कोरोना विषाणूंच्या संसर्गामुळे मंदिरात पाच जणांच्या उपस्थितीत येळकोट येळकोट ‘जय मल्हार’, ‘मल्हारी मार्तंड’ की जयच्या जयघोषात हळदीच्या भंडाऱ्याची उधळण करण्यात आली. त्यानंतर फळांचा नैवेद्य अर्पण करून महाआरती करण्यात आली.

दरम्यान, खंडोबा यात्रोत्सवाला सुरुवात झाली असून, घराघरांतही खंडोबाची घटस्थापना करण्यात आली. दररोज खंडोबा मंदिरात महाआरती होणार असून, कोरोनाचे नियम पाळत सकाळी ७ ते सायंकाळी ७ वाजेपर्यंत भाविकांना दर्शनासाठी प्रवेश दिला जाणार आहे. खंडोबा देवस्थान समितीचे अध्यक्ष साहेबराव पळसकर, सचिव गंगाधर पारखे, विश्वस्त मोहन काळे, दिलीप दांडेकर, विठ्ठल देवकर, गोविंद चोपडे, रमेश चोपडे, लक्ष्मण चोपडे, श्रीधर झरेकर, गणेश खोरे, सुभाष पारखे, मोहन पवार, सुखदेव बनगर, विजय धुमाळ, सिंधूताई धुमाळ ही मंडळी परिश्रम घेत आहे.

मंदिरात वाघ्या मुरळीची डफ, तुणतुण्याचा गरज, खंडोबाची उपासना, सामुहिक तळी उचलण्याचा कार्यक्रम, अन्नदान, भक्तनिवासास शासनाने बंदी घातली आहे. तसेच गाभाऱ्यात दर्शनासाठी जाणाऱ्या भाविकांना मास्कची सक्ती करण्यात आली. यात्रेसाठी सातारा पोलिसांसह एक अधिकचे पोलिस निरीक्षक, दहा उपनिरीक्षक, ६० कर्मचारी, ४० वाहतूक कर्मचारी तैनात करण्यात आले आहेत.

मंदिर परिसरात रेवड्यांची उधळण

खंडोबा यात्रोत्सवाला रविवारपासून सुरुवात झाली. आज पहिल्याच दिवशी दर्शनासाठी भाविकांची प्रचंड गर्दी उसळली होती. सकाळी ९ वाजेपासूनच भाविकांची रांग लागली. दरम्यान, हळदीचा बेलभंडारा, रेवड्यांची उधळण करीत येळकोट येळकोट जयमल्हारच्या जयघोषात भाविक दर्शन घेत होते.