बदनापूर (जिल्हा जालना) - राज्यातील धनगर समाजाला अनुसूचित जमातीच्या आरक्षणाची तातडीने अंमलबजावणी करावी, या प्रमुख मागणीसाठी बदनापूर येथील तहसील कार्यालया समोरील जालना - छत्रपती संभाजीनगर महामार्गावर सोमवारी (ता. २३) धनगर समाज बांधवांनी तब्बल दोन तास आंदोलन केले. या आंदोलनामुळे महामार्गावरील वाहतूक काहीकाळ ठप्प झाली होती. शेवटी तहसीलदार अश्विनी डमरे यांना निवेदन सादर करण्यात आले.

निवेदनात नमूद केले आहे की, राज्यातील धनगर समाजाला घटनेने अनुसूचित जमातीचे आरक्षण दिलेले आहे. मात्र राज्यकर्त्यांच्या नकारात्मक भूमिकेमुळे महाराष्ट्रातील आदिवासी असलेला धनगर समाज कायम अनुसूचित जमातीच्या सवलतींपासून वंचित राहिला आहे.

धनगर समाजाने आम्हाला मतदान करून सत्ता दिली तर आम्ही पहिल्याच मंत्रिमंडळाच्या बैठकीत धनगर समाजाला अनुसूचित जमातीचे आरक्षण देऊ, असा शब्द उपमुख्यमंत्री देवेंद्र फडणवीस यांनी दिला होता. मात्र यानंतर राज्यकर्त्यांनी आरक्षणाबाबत टाळाटाळ करण्यात सुरुवात केली. धनगर समाजाला अनुसूचित जमातीच्या सवलतींची गरज असताना धनगर समाजासाठी विविध योजना मंजूर करून तोंडाला पाने पुसली जात आहे.

आगामी विधानसभा निवडणूक तोंडावर आल्याने समिती स्थापन करण्याचे नाटक केले जात आहे. मात्र यासर्व योजना आणि समितीवर धनगर समाज भाळणार नाही. धनगर समाजासाठी हक्काचे अनुसूचित जमातीच्या अंमलबजावणी करण्याचा निर्णय घ्यावा, अन्यथा धनगर समाज पेटून उठल्याशिवाय राहणार नाही, असे नमूद केले आहे.

यावेळी रास्ता - रोको आंदोलनात धनगर समाज बांधवांनी आरक्षणाच्या अमलबजावणीसाठी जोरदार घोषणाबाजी केली. तसेच अनेकांनी आपले विचार व्यक्त केले. या आंदोलनात मल्हार सेनेचे मराठवाडा अध्यक्ष पांडुरंग कोल्हे, किसानसेना जिल्हाध्यक्ष कृष्णा खरात, संजय गांधी निराधार समितीचे सदस्य गणेश कोल्हे, मल्हार सेना तालुकाध्यक्ष सोपान भांड, धनगर समाज संघर्ष समितीचे तालुकाध्यक्ष बालाजी कानुले, बजरंग वैद्य, प्रभाकर जोशी, राम जोशी गजानन कानुले, राजू खरात, केतन खरात, भागवत कुरधने, संभाजी काळे, सोमनाथ सातपुते, योगेश गायके, विष्णू जोशी, दिनेश कोल्हे, पंकज कोल्हे, विठ्ठल तोतरे, योगेश नरवडे, बाळू काळे, गणेश थोरात, सचिन सोलाट, त्रिंबक चाळगे आदींसह असंख्य समाज बांधव सहभागी झाले होते.