केज : एका आजारी रुग्णावर आयुर्वेदिक औषधोपचार करणाऱ्या आणि स्वतःला महाराज म्हणविणाऱ्याने आजारी असलेल्या रुग्णाच्या अल्पवयीन मुलीला पळवून नेल्याची घटना समोर आली आहे.

या प्रकरणी अल्पवयीन मुलीच्या आईने पोलिसात दिलेल्या तक्रारीवरून गुरुवारी (ता.१८) रात्री उशिरा पोलीसात गुन्हा दाखल करण्यात आला आहे. तालुक्यातील एका आजारी रुग्णावर आयुर्वेदिक औषधोपचार करण्यासाठी घरी येत असणाऱ्या एका भामट्याने, आजारी वडिलांची देखभाल करणाऱ्या मुलीला फूस लावून चारचाकी वाहनातून‌ (एमएच-१६/एजे-६५००) पळवून नेले.

त्या अल्पवयीन तरुणीला वाहनातून घेऊन जात असल्याचे तिच्या चुलत्याने पहिले. त्यांनी काही वेळातच त्या भामट्याचा पाठलाग करून शोध घेतला असता ते दोघे सापडले नाहीत. त्यामुळे त्या मुलीच्या आईने युसुफवडगाव पोलिस ठाण्यात तक्रार दिली. यावरून माउली धोंडीराम भोसले (रा. मगरवाडी, ता. अंबाजोगाई) याच्या विरोधात गुन्हा दाखल करण्यात आला आहे.